Juupel mor njaŋ
1 Yee David ne cok mo ɗǝǝ lǝŋ ne ko wo Dǝɓlii tǝ ɓǝ Kus, dǝɓ ban Benyaamin.
2 Dǝɓlii, Masǝŋ ɓe, me kyeɓ cok muŋ ge ɓo wo ɓo,
Mo ǝ̃ǝ me gin jol za mai mo tǝ foora mor ɓe daŋ.
Mo gbah jol ɓe,
3 Ka mo pahlra me tǝgbana ɓol moo pahl fan so pa ma gbah jol fan ah tǝkine ǝ̃ǝ ko gin zah ah mo ka yea ya ka.
4 Dǝɓlii, Masǝŋ ɓe, mo lii ɓǝ ɓe ɗao.
Me joŋ ɓǝɓe' wo dǝɓ ki ɓe,
5 Wala me joŋ palyaŋ ɓe ɓo pǝɓe' ɓe,
Koo me cuu syak ɓo nyi za syiŋ ɓe bai mor ɓe,
6 Ka za syiŋ ɓe mo foora mor ɓe, mo gbǝra me ɓoo ge sǝŋ,
Ka mo ira me pǝ wul mo soɓra me ɓoo tǝ sǝr nooko.
7 Dǝɓlii, mo ur sǝŋ ne kpãh ma ɓo,
Mor za syiŋ ɓe ɓaŋra kpãh ɓo ne me pǝlli.
Mo urri, mo ŋgoŋ kiita tǝ ɓǝ ɓe,
Mor amo ŋgoŋ kiita pǝsãhe.
8 Mo tai za daŋ ge kah ɓo,
Ka mo yee kaa tǝ fakal tǝ ɓǝǝ sǝŋ.
9 Dǝɓlii, amo ye pa kiita za daŋ.
Mo ŋgoŋ kiita ɓe tǝgbana njaŋ ɓe,
Tǝgbana bai ɓǝɓe' ɓe me ne ko tǝkine ɓǝ sãh ɓe.
10 Mo soɓ ɓǝɓe' za faɓe' i zah o,
Amma mo swaa dǝɓ matǝ njaŋ.
Masǝŋ, amo ye Dǝɓ matǝ njaŋ,
Mo ŋgoŋ kiita tǝ ɓǝ foo tǝkine fan cwaa zahzyilli.
11 Masǝŋ ako ye pa byak ɓe,
A ǝ̃ǝ za mai moo laara zah ahe.
12 Masǝŋ ako ye pa kiita matǝ njaŋ,
A ŋgoŋ kiita tǝ za faɓe' zah'nan daŋ.
13 Dǝɓ ɓe' mo fer ɓǝ ah ya ɓe,
Masǝŋ a syiŋ kafahe ahe, a yil saŋ ahe,
A woo ka 'nǝǝni.
14 A 'naa nãaguu,
A haŋ guu ah mor wii pǝcwakke.
15 We ẽe dǝɓ ɓe' a foo ɓǝ maɓe' ahe,
A gban ɓil ɓǝɓe' pǝ zahzyilli,
A byaŋ vǝrvǝr gin lalle.
16 A cii lak ga sǝŋ ɓoroo,
A so lee ga pǝ lak ah ne suu ahe.
17 Ɓǝɓe' ah pii soo ga tǝ suu ahe,
Ɓǝɓe' lii ah moo joŋko a ga jin sye ko.
18 Me ga joŋ osoko nyi Dǝɓlii mor ɓǝ tǝ njaŋ ahe.
Me ga ɗǝǝ lǝŋ yii Masǝŋ mayǝk ne ko.
© Bible Moundang © Alliance Biblique du Tchad, 1996.
