Juupel ma mor goŋe
1 Lǝŋ Salomo.
Masǝŋ, mo cuu nyi goŋ ka mo ŋgoŋko kiita ne njaŋ ɓo,
Mo nyi njaŋ ɓo nyi goŋe,
2 Ka mo kaako goŋ tǝ za ɓo ne fahlii,
Ka mo kaa goŋ tǝ za syak ne fahlii matǝ goŋga ahe,
3 Ka sǝr mo kaa jam, ɓǝ foo matǝ goŋga mo yea gŋ,
4 Ka goŋ mo ŋgoŋ kiita tǝ za syak ne fahlii ahe,
Ka mo gbahko jol za ma pǝ bone,
Ka mo cuuko swãa za ma cuura bone nyi ra.
5 Ka ne cok com ne fĩi mo tǝ joŋra yeɓ ɓǝǝ ba, za ɓo mo juura pel wo ɓo ne ko.
6 Ka goŋ mo yea tǝgbana bam mai moo tan gin pǝ'wahe,
Mo yeako tǝgbana bam mai moo njiɓ gin pǝ 'wahe.
7 Ka ne zah'nan goŋ ah njaŋ ah mo fãi ge lal tǝgbana fãi fanne,
Ka ne cok fĩi mo tǝ joŋ yeɓ ah ba, jam mo yea tǝ sǝr ahe.
8 Sǝr goŋ ah a ga kan ne zah mabii taataa,
A ga tǝŋ daga kah el Efrat ŋhaa ka dai zahtǝmgboo sǝrri.
9 Za ma kaara kǝsyicok a ga keara sǝŋ pel ahe.
Za syiŋ ah ga swahra tǝ sǝr pel ahe.
10 Za goŋ sǝr Espania ne goŋ ma pǝ kyo ra daŋ a ga nyira fan nyi.
Za goŋ sǝr Arabia ne Etiopia ga gera nyi ne fan nyini.
11 Za goŋ daŋ a ga keara sǝŋ pel ahe,
Za sǝr daŋ ga joŋra mor ahe.
12 Pa syak mai mo ɗii ko ɓe, a wǝǝ ko ne mabaidǝɓ mai mo ka ne za byak ɓǝǝr a.
13 A kwan syak tǝ pa tǝ jok ne pa syakke.
A gbah jol za mai mo ka ne fan ki ya.
14 A wǝǝ ra jol za mai mo tǝ joŋra ɓǝɓe' wo ɓǝǝ ne cuu bone nyi ra,
Cee ɓǝǝ wol ah pǝsyemme.
15 Masǝŋ mo soɓ tǝ goŋe!
Ka mo nyira vãm kaŋnyeeri ma sǝr Arabia nyi ko,
Ka mo juura pel mor ah cẽecẽe,
Ka ẽe Masǝŋ mo yea tǝl ah zah'nan daŋ,
16 Ka sor mo yea tǝ sǝr ah pǝlli,
Ka fakpãhpǝǝ mo joŋ kah waa ah ra,
Tǝgbana mai mo joŋ pǝ sǝr Liban.
Ka yaŋ ah maluu mo baa ne dǝfuu kǝrkǝr,
Mo yeara tǝgbana fãa mo yea lalle,
17 Ka mo yaŋra tǝɗii ah ka syaŋsyaŋ,
Ka ne cok com mo tǝ joŋ yeɓ ah ba, tǝɗii ah mo yea wo sǝr ta,
Ka za sǝr daŋ mo yiira ko,
Ka za daŋ mo fiira Masǝŋ ka ẽe ra tǝgbana mo ẽe goŋ ta.
18 Osoko wo Dǝɓlii Masǝŋ Israel mai ako ye moo gak joŋ fan matǝ gǝriŋ ah ra syak ah to.
19 Na yii tǝɗii ah ga lii ga lii,
Ka yǝk ah mo yea tǝ sǝr ne lii ah daŋ.
Amen! Amen!
20 David we Isai i zah juupel ah ra naiko.
© Bible Moundang © Alliance Biblique du Tchad, 1996.
