ƊEREWOL PATƏ SAI AHE
Njaŋ Masǝŋ
1 Lǝŋ Asaf.
Masǝŋ a pǝsãh wo za Israel mai zahzyil ɓǝǝ mo pǝsãhe.
2 Amma coŋ biŋ ka me lee ge sǝŋ,
Ɓal ɓe tǝ yah fiŋ kǝnah ka leere,
3 Mor me joŋ tǝwon ne za ma yiira suu,
Me kwo za maɓea ah kǝ̃ǝra ɓo ne fanne.
4 Ka laara bone ya,
Ara pǝswahe, ara jam.
5 Ka laara bone tǝgbana za ki moo laa ya,
Ka lwaara gaɓ tǝgbana za ki moo lwaa ya ta.
6 A saara yii suu ma wo suu tǝgbana dǝɓ moo saa fãi solle,
A ɓaara ɓǝɓe' wo suu tǝgbana mbǝro solle.
7 Ɓǝɓe' a pǝ̃ǝ pǝ zahzyil ɓǝǝ gin lalle,
Ɓǝ foo ɓǝǝ baa ɓo ne ɓǝɓe' gǝɓ.
8 A syakra za ki,
A faara ɓǝ maɓea ah ra.
A yiira suu,
A faara ɓǝ ma joŋ ɓǝɓe' wo za ki ne ko.
9 A faara ɓǝɓe' tǝ Masǝŋ ma coksǝŋ,
So a faara ɓǝ cuu fahlii maɓe' ah nyi za ne wo sǝrri.
10 A joŋra nai ŋhaa za Masǝŋ a gara wo ɓǝǝ a nyiŋra ɓǝ faa ɓǝǝ gwari .
11 A faara: Masǝŋ ka ga tǝ ɓǝ ah ya,
Masǝŋ mayǝk ka ga laa ɓǝ ah ya.
12 Za maɓea ah ara naiko.
Kǝ̃ǝra ɓo ne fanne,
So a lwaara fan ga gŋ zah'nan daŋ.
13 Me gaɓ suu ɓe ne byak suu ɓe tǝkine jol ɓe ka me maa ge pǝ faɓe' ka tǝkol ne?
14 Masǝŋ, amo joŋ me laa bone zok com ne wõi,
Zah'nan daŋ mo ŋgoŋ kiita tǝ ɓe.
15 Me tǝ faa ɓǝ fan marai daŋ gin lal ɓe,
Me ga yea na dǝɓ ma bai goŋga wo za ɓo.
16 Koo ɓǝ ah mo pǝgaɓ ko laŋ,
Me kyeɓ ne swah ka me laa mor ahe, amma me gak ya,
17 Ŋhaa me ge yaŋ ɓo,
Me laa gur mor ɓǝ fan mai mo tǝ ga joŋ za maɓe' ah ɓe.
18 Goŋga, mo rǝk ra ɓo pǝ cok marwãh ah ka mo fiŋra gŋ lee ge sǝŋ mo wukra.
19 A ga wukra ne cok ah tǝɗe' sǝ,
In zah ɓǝǝ ga yea pǝgaɓ no cam.
20 Dǝɓlii, ara tǝgbana lom mai dǝɓ mo loo ne suŋ ɓe,
Ne zah'nan dǝɓ mo ka so tan ɓǝ ah yao.
Mo kpiŋ ɓe, mo yaŋni,
Mor ah ɗǝne, dǝɓ ka tan ao.
21 Ne cok ɓǝ foo ɓe mo jin tǝtǝl nyi me,
Ɓǝ ah so sye zahzyil ɓe,
22 Me ciŋ tǝgwĩi, me tǝ mor ah ya,
Me joŋ fan wo ɓo tǝgbana faɓalle.
23 Ne daŋ laŋ, cẽecẽe me no ne mo,
Mo gbǝ me ɓo ne jolle.
24 Mo tǝ syee ne me, mo tǝ lai me,
Ne zah'nan wul ɓe ɓe, mo ga nyiŋ me ga wo ɓo na dǝɓɓi.
25 Ame ka ne fan maki ah coksǝŋ ya, sai amo to.
Me ne mo ɓe, me so 'yah fẽe wo sǝr nyee faɗa ne?
26 Koo zahzyil ɓe ne suu ɓe mo joŋ pǝtǝtǝ̃ǝ laŋ, amma Masǝŋ ye swah ɓe,
Fan ki ka pee me ya.
27 Goŋga, za mai mo soɓra mo ɓoo a ga wukra.
Mo ga muŋ za mai daŋ mo ka joŋra fan goŋga wo ɓo ya.
28 Amma a pǝsãh wo ɓe ka kaa kah Masǝŋ gwari.
Dǝɓlii Masǝŋ ye pa byak ɓe,
So me gak faa ɓǝ fan mai mo joŋko daŋ nyi zana.
© Bible Moundang © Alliance Biblique du Tchad, 1996.
