Masǝŋ kacella yo
1 Lǝŋ Asaf.
2 Tǝra Masǝŋ ɓo pǝ sǝr Yuda daŋ,
Tǝɗii ah pǝyǝk kǝsyil za Israel daŋ.
3 Yaŋ ah a Jerusalem,
Kaa ɓo tǝwaa Sion.
4 Hah saŋ za syiŋ ah ne bal ruu sal ɓǝǝ ne kafahe tǝkine fan sal ɓǝǝ daŋ ge lal gŋ ŋhaako.
5 Masǝŋ, amo pǝyǝkki, amo pǝswahe,
Ne cok mo pii soo gin tǝwaa ne cok mai mo cuu swãa za syiŋ ɓo ra.
6 Amo nyiŋ fan mai sooje ɓǝǝ maswah mo woora zah salle.
So zǝzǝ̃ǝko nwãhra nǝm ɓo tǝgbana wulli.
Dǝɓ ma gak ur joŋ yeɓ ne fan sal kǝka kǝsyil ɓǝǝ vaŋno ya.
7 Ne cok amo Masǝŋ Yakuɓ mo lai ra,
Pǝr tǝkine za ma yee tǝl ah daŋ leara ge sǝŋ na wulli.
8 Amma amo Dǝɓlii, za daŋ a ɗuura galle.
Ne cok mo ɓaŋ kpãh ɓe, azu yee gak uu pel ɓo ne?
9-10 Ne cok mour ɓo sǝŋ mor ka ŋgoŋ kiita ka ǝ̃ǝ za matǝ jok ah wo sǝrri,
Mo joŋ kiita ɓo daga coksǝŋ cuu ge nyi za lal wat,
Za sǝr ɗuura gal haira 'wa 'wa.
11 Kpãh dǝfuu ka joŋ fan ki ya,
Sai ɓǝ ah a in zah ne yii yǝk ɓo to.
Za mai mo ǝ̃ǝra gin zah sal mo lwaa wukra ya a ga yiira mo.
12 Mo nyi fan mai mo faa ɓǝ ah ɓo ka nyi nyi Dǝɓlii Masǝŋ ɓo nyi ko.
Zahban mai ara mo kah ɓo gwari a ga gera nyi ko ne fanne.
13 Masǝŋ joŋ dǝfuu a ɗuura gal ahe,
Tǝr za goŋ ma yiira suu ɓǝǝ ge falle,
Joŋ za goŋ maluu wo sǝr daŋ ɗuura galle.
© Bible Moundang © Alliance Biblique du Tchad, 1996.
