Yee ma yee fii gbah jolle
1 Lǝŋ wee Kora. Ɓǝ Heman Ezrakiyo.
2 Dǝɓlii, Masǝŋ, pa ǝ̃ǝ ɓe, com ne suŋ daŋ me yeyee pel ɓo.
3 Mo laa juupel ɓe,
Mo laa yee ɓe me tǝ yee fii mo ka mo gbah jol ɓe.
4 Bone tai ɓo tǝtǝl ɓe pǝlli,
Ame zah wul gwari.
5 Soɓra me ɓoo ɓe, keera me kǝsyil za ma ga pǝ palle mor swah ɓe daŋ pee ɓe.
6 Koo zǝzǝ̃ǝ laŋ tǝ keera me kǝsyil za mai mo wukra ɓe,
Me tǝgbana wul ma pǝ pal o.
Ame tǝgbana dǝɓ mai mo ka tǝ foo ɓǝ ah yao,
Na dǝɓ mai mo ka gak gbah jol ah yao.
7 Mo ɓoo me ge ɓo pǝ lak maɗǝk tǝ ɓoroo ahe.
8 Mo ɓaŋ kpãh ɓo tǝ ɓe pǝ'manne,
Kpãh ɓo kal tǝ ɓe ɓe.
9 Mo ye nĩi bai ɓe ra gin kah ɓe,
Amo ye joŋ me ka me yea wo ɓǝǝ tǝgbana dǝɓ ɓe'.
Zahfah coo ɓo tǝ ɓe,
Me ka gak pǝ̃ǝ ya,
10 Ŋhaa mĩi yee pee nahnǝn ɓe mor bone mai me tǝ laani.
Dǝɓlii, zah'nan daŋ me ɗii mo,
Me woo jol ɓe ga sǝŋ ne juupel wo ɓo.
11 Za mai mo wuk ɓe, mo joŋ dǝǝbǝǝri ka mo ẽera no ne?
A gak urra ka yii mo kpǝ ne?
12 A foora ɓǝ 'yah ɓo pǝ pal no ne?
A faara ɓǝ goŋga ɓo pǝ cok muŋ no ne?
13 A kwanra dǝǝbǝǝri ɓo pǝ cok za wul no ne?
A foora ɓǝ ǝ̃ǝ ɓo gŋ no ne?
14 Dǝɓlii, me tǝ fii mo ka mo gbah jol ɓe,
Zah'nan daŋ me juupel wo ɓo.
15 Dǝɓlii, mo soɓ me ɓoo mor fẽene?
Mo muŋ suu ɓo ka ɓe mor fẽene?
16 Daga laŋ ɓe me pǝ cok pǝgaɓɓe,
Me zah wul gwari.
Me laa bone, mo tǝ cuu syak nyi me pǝlli.
17 Kpãh ɓo gin tǝ ɓe,
Ɓǝ ah tǝ kyeɓ ka muŋ me.
18 Zah'nan daŋ kpãh ɓo gin tǝ ɓe na bii,
A kyeɓ ka raa me.
19 Mo ye nĩi bai ɓe ra gin kah ɓe kalle,
Me ka ne bai maki kah ɓe ya,
Sai cokfuu ye kah ɓe to.
© Bible Moundang © Alliance Biblique du Tchad, 1996.
