Masǝŋ ye goŋ tǝ goŋ daŋ
(1 KeeƁ 16:23-33)1 We ɗǝǝ lǝŋ mafuu ah nyi Dǝɓlii.
Awe za sǝr daŋ, we ɗǝǝ lǝŋ wo Dǝɓlii!
2 We ɗǝǝ lǝŋ yii Dǝɓlii ne ko.
Zah'nan daŋ we cuu ɓǝ ǝ̃ǝ ah mo ǝ̃ǝ na ɓo nyi za ki.
3 We kee ɓǝ yǝk ah nyi zana,
We faa ɓǝ yeɓ ah matǝ gǝriŋ nyi za sǝr daŋ.
4 Dǝɓlii pǝyǝkki,
Kii nǝn mai ka dǝɓ mo yii ko ɓe.
A pǝyǝk kal masǝŋ ki ra daŋ.
5 Masǝŋ za ki daŋ fan kol o,
Amma Dǝɓlii ye joŋ sǝŋ.
6 Ako pǝ'manne, a pǝyǝkki,
Yaŋ ah baa ɓo ne swah tǝkine yǝk kǝrkǝr.
7 Awe za sǝr daŋ, we yii Dǝɓlii.
We yii ko, mor a pǝyǝkki,
A pǝswah ta.
8 We yii tǝɗii Dǝɓlii mai mo pǝyǝkki,
We dan ge yaŋ ah ne fan nyi ɓiiri.
9 We kea sǝŋ pel Dǝɓ matǝdaŋdaŋ.
Awe za sǝr daŋ, we coo pel ah coo.
10 We faa kǝsyil za sǝrri:
Dǝɓlii ye goŋe,
Joŋ sǝr uu ɓo pǝ cok tǝ vaŋno,
Ka fer ga cok ki ya.
A ga ŋgoŋ kiita tǝ za sǝr daŋ njaŋ.
11 Coksǝŋ ne sǝr daŋ, we laa pǝ'nyahre.
Mabii tǝkine fan ma no mor ah daŋ, we laa pǝ'nyahre.
12 'Wah tǝkine fakpãhpǝǝ mo joŋ ɓo gŋ daŋ, we laa pǝ'nyahre.
Kpuu daŋ ga ɗǝǝra lǝŋ ne laa pǝ'nyah pel Dǝɓlii.
13 Mor ako tǝ gin kaa goŋ tǝ sǝr daŋ,
A ga kaa goŋ tǝ za sǝr daŋ ne zahzyil pǝfãi.
© Bible Moundang © Alliance Biblique du Tchad, 1996.
