Nǝǝ matǝ gwa
1 So me kwo nǝǝ tǝ pǝ̃ǝ gin pǝ mabii. A ne ciŋ jemma, a ne tǝtǝl rǝŋ, maa njok vãm ɓo tǝ ciŋ ah ra daŋ, tǝɗii ma faa ɓǝɓe' tǝ Masǝŋ ŋwǝǝ ɓo tǝtǝl ah ra. 2 Nǝǝ mai me kwo, jur kpiŋ ɓo, ɓal ah ra a tǝgbana ɓal goobamme, zah ah a tǝgbana zah ɓolle. Dragoŋ nyi swah ah nyi nǝǝ ah ne fakal ah tǝkine goŋ ah daŋ. 3 Me kwo tǝtǝl nǝǝ ah maki ah vaŋno lwaa nwãh ɓo na fan wun ne ko, amma nwãh ah so laɓ ɓe. Za sǝr ne lii ah daŋ kaara gǝriŋ, so syeera mor nǝǝ ahe. 4 Za daŋ so juura pel wo dragoŋ mor nyi swah ah ɓo nyi nǝǝ. So a juura pel wo nǝǝ ah a faara: Azu ye zahki ne nǝǝ ah ne? Azu yee gak ruu sal ne ki ne?
5 Nǝǝ ah lwaa fahlii ka faa ɓǝ ma yii suu ne ko, tǝkine faa ɓǝɓe' tǝ Masǝŋ, lwaa swah ka joŋ nai tǝgbana fĩi jemma nai tǝtǝl gwa. 6 So kal tǝ faa ɓǝɓe' tǝ Masǝŋ ne tǝǝ tǝɗii ah ne cok kal ahe, tǝkine za mai mo kaara ɓo coksǝŋ daŋ. 7 Nyira swah nyi ka ruu sal ne za Masǝŋ, so ka kaa kacella tǝ ɓǝǝra. So nyira swah nyi tǝ zahban daŋ, tǝ dǝfuu daŋ, tǝ zah daŋ, tǝkine tǝ za daŋ. 8 Za mai mo kaara ɓo wo sǝr daŋ a ga juura pel wol ahe, tǝgba faa: za mai tǝɗii ɓǝǝ mo ŋwǝǝ ɓo ka pǝ Ɗerewol Cee daga tǝtǝŋ sǝr pǝ ɗerewol mǝ Wepǝsãhm mai mo wǝ ɓo ya.
9 We ne sok ka laa ɓǝ ɓe, we laa pǝsãhe! 10 Dǝɓ mo mor ka gban na byakke, a ga gbǝra ko na byak 'manna, dǝɓ mo mor ka in pǝ wul ne kafahe, a ga ira ko ne kafahe 'manna. Mor ah za Masǝŋ mo tǝ ɓǝ mai ɓe, a gak yeara ne rõm tǝkine iŋni.
11 So me kwo nǝǝ maki ah tǝ pǝ̃ǝ gin mor sǝrri. A ne ciŋ gwa tǝgbana ciŋ we pǝsãhmme, a faa ɓǝ tǝgbana dragoŋ. 12 A joŋ fan daŋ ne swah nǝǝ ma zahnahpel mo ge kǝpel nyi ko, a joŋ za mai mo kaara ɓo wo sǝr ne swahe, ka mo juura pel wo nǝǝ ma kǝpel mai mo lwaa nwãh mo tǝ yah wun kǝnah ne kŋ mo so laɓ ɓo. 13 Nǝǝ patǝ gwa ah nyẽe joŋ dǝǝbǝǝri maluu camcam pǝlli, a joŋ ka wii mo ɗǝr gin sǝŋ ge sǝŋ ne nahnǝn za daŋ. 14 Nǝǝ ah a zyak za mai mo kaara ɓo wo sǝr ne dǝǝbǝǝri mai mo nyi fahlii ah ɓo ka joŋ pel nǝǝ ma zahnahpelle. A faa nyi za ma kaara wo sǝr ka mo zyeɓra foto ka yii nǝǝ mai mo cera ne kafahe, so mo ne cee. 15 Nǝǝ patǝ gwa ah lwaa swah ɓo ka nyi tǝ'yak ma i tǝ'yak nyi foto nǝǝ ma kǝpelle, mor ka foto ah mo gak faa ɓǝ, ka mo gak ik za mai daŋ mo ka tǝ juura pel wol ah ya. 16 Nǝǝ ah a ga joŋ za daŋ ne swahe, wee nyeere, zaluuri, ne za joŋne, za syakke, byakke, tǝkine za ma ne tǝtǝl suu ɓǝǝra, ka mo nyiŋra lamba tǝ jokǝsãh ɓǝǝ ne zahpel ɓǝǝra. 17 Dǝɓ mo ka ne lamba nǝǝ ah wala ne numero ɗii ah ya ɓe, ka lwaa lee fan a, ka lee fan ne fan a ta.
18 Ɓǝ fatan ah a naiko: dǝɓ mo ne tǝtǝl ɓe, a gak kee lamba nǝǝ ahe, mor fan kee ah fan kee dǝfuu yo, mor fan kee ah jur ɓo ne ɗii dǝɓɓi. Kee ah a temere yea ne jemma yea tǝtǝl yea.
© Bible Moundang © Alliance Biblique du Tchad, 1996.
