Lamba
1 So me kwo Wepǝsãhm gbǝr lamba patǝ vaŋno ah kǝsyil lamba matǝ rǝŋ. Me laa vaŋno kǝsyil fan matǝ nai ma ne cee faa ɓǝ ne kyaŋ lii tǝgbana ɓyaŋ bamme, faa: Mo ge o! 2 Me ẽere, me kwo pǝr pǝfãi, dǝɓ mai mo yee ɓo tǝl ah a ne saŋ jolle, so nyira njok vãm ɓo nyi. Pǝ̃ǝ kal na pa swahe, ka ga kaa swah faɗa.
3 So Wepǝsãhm gbǝr lamba patǝ gwa ahe. Me laa patǝ gwa fan matǝ nai ma ne cee faa: Mo ge o! 4 So me kwo pǝr maki ah pǝ̃ǝ, a pǝsyẽ, dǝɓ mai mo yee ɓo tǝl ah lwaa swah ɓo ka ur sal wo sǝrri, mor ka za mo ikra ki pǝ wulli. Nyira kafahe malii ɓo nyi ko.
5 So Wepǝsãhm gbǝr lamba patǝ sai ahe. Me laa patǝ sai fan matǝ nai ma ne cee faa: Mo ge o! Me ẽere, me kwo pǝr pǝfuu, dǝɓ ma yee tǝl ah a ne tahsah lii fan jolle. 6 Me laa cii fan tǝgbana kyaŋ pǝ̃ǝ gin kǝsyil fan matǝ nai ma ne cee faa: Alkamaari tahsah vaŋno, a mor soo yeɓ zah'nan tǝ vaŋno. Sor tahsah sai, a mor soo yeɓ ma zah'nan vaŋno ta. Amma mo ɓeɓ nǝm ne kpuu vin ka.
7 So Wepǝsãhm gbǝr lamba patǝ nai ahe. Me laa patǝ nai fan matǝ nai ma ne cee faa: Mo ge o! 8 Me ẽere, me kwo pǝr pǝgbǝ̃ǝ, dǝɓ mai mo yee ɓo tǝl ah a ɗii ne wulli, cok mai za ma wul moo ga gŋ a syee mor ahe. Nyira swah nyi ra tǝ patǝ nai sǝrri, mor ka mo ikra za ne kafahe, ne koŋne, ne syemme, tǝkine fafyãh cokki.
9 So Wepǝsãhm gbǝr lamba patǝ dappe ahe. So me kwo mazwãhsuu za mai mo ikra ra pǝ wul mor cuura ɓǝ faa Masǝŋ tǝkine syedowal goŋga mai mo joŋra, mor cok joŋ syiŋrĩ. 10 Ŋwaara ɓǝ ne kyaŋ lii zahki daŋ faara: Dǝɓlii matǝdaŋdaŋ, matǝ goŋga, mo tǝ byak ka ga ŋgoŋ kiita tǝ za mai mo kaara ɓo wo sǝr ka faŋ val mai mo ikra ru pǝ wul tǝtǝl ɓǝǝ sye nekẽne? 11 So womra mbǝro fãi nyi ra vaŋno vaŋno daŋ, faara nyi ra: We kaa 'yak nje ɗao faɗa, ŋhaa ka pãa wee pa ɓǝǝ ne za ma joŋra yeɓ na ra mai moo ga ikra ra pǝ wul tǝgbana ra mo baa ɗao.
12 So me kwo Wepǝsãhm gbǝr lamba patǝ yea ahe. Sǝr coo pǝ'man gǝrgǝrri, com foo pǝfuu tǝgbana mbǝro fuu, fĩi ne lii ah daŋ ciŋ tǝgbana syimmi. 24:29; Mk 13:24-25; Lu 21:25 13 Ŋwǝǝmǝŋgai sǝŋ 'mǝr ge sǝŋ tǝgbana kpuu wuu mai zyak mo tǝ kuu pǝ'man ɓe moo 'mǝr lee ah macuu gin sǝŋ rattǝtǝǝ. 14 Coksǝŋ cẽe ge tǝki tǝgbana dǝɓ moo cẽe ɗerewol, waa tǝkine kyo daŋ zolra gin pǝ cok ɓǝǝra. 15 Za goŋ sǝrri, zaluuri, za swah salle, za makǝ̃ǝre, za maswahe, tǝkine za ki daŋ, byakke, ne za ma ne tǝtǝl ɓǝǝ daŋ mokra suu ɓǝǝ pǝ yii tǝkine tǝgǝǝ tǝsal tǝwaare. 16 Faara nyi waa tǝkine tǝsalle: We lea ge tǝ ɓuu ka we jaa ru, mor ka muŋ ru nahnǝn Dǝɓ mai mo kaa ɓo tǝ fakal tǝkine pel kpãh Wepǝsãhmme. 17 Mor zah'nan kpãh ɓǝǝ malii ge ɓe, azu yee gak cak ne?
© Bible Moundang © Alliance Biblique du Tchad, 1996.
