1 So angelos patǝ dappe ah ul kokõorĩi. Me kwo ŋwǝǝmǝŋgai lee gin sǝŋ ge tǝ sǝrri, nyira lakǝle lak matǝ ɓoroo nyi ko. 2 Ŋwǝǝmǝŋgai gbǝr zah lak matǝ ɓoroo, suŋwii pǝ̃ǝ gin pǝ lak ah tǝgbana suŋwii ma suŋ ciiri, suŋwii mai mo pǝ̃ǝ gin pǝ lak ah foo com tǝkine masyiibam daŋ. 3 Tǝzyee pǝ̃ǝra gin pǝzyil suŋwii ah so myahra wo sǝr ne lii ah daŋ, nyira swah nyi ra tǝgbana mǝ dǝweri, 4 faara nyi ra ka mo cuura bone nyi fãa ka, mo cuura nyi kpuu ka, mo cuura nyi fan ma ciciŋ maki ah laŋ ka. Sai mo cuura bone nyi za mai mo ka ne lamba Masǝŋ zahpel ɓǝǝ ya to. 5 Tǝzyee ah lwaara fahlii ɓo ka ka mo ikra zan ah pǝ wul a, amma sai ka mo cuura bone nyi ra fĩi dappe. Bone mai moo ga cuura nyi zana, a syen tǝgbana dǝweri mo dǝ dǝɓ ɓe moo syenne. 6 Ne cok bone ah moo ga nǝn fĩi dappe naiko, za ga cwaara wulli, amma ka lwaara ya, a ga 'yahra wulli, amma wul ga ɗuu gin wo ɓǝǝ kal pǝɗǝkki.
7 Tǝzyee ah a kwan tǝgbana pǝr mai mo bamra ɓo ka ga ruu salle. Njok vãm kaŋnyeeri no tǝtǝl ɓǝǝra, zahpel ɓǝǝ tǝgbana zahpel dǝfuu. 8 Rĩi tǝtǝl ɓǝǝ a tǝgbana rĩi tǝ ŋwǝǝre, syel ɓǝǝ a tǝgbana syel ɓolle. 9 Zahbii ɓǝǝ fan kwan gŋ tǝgbana vãm syẽ, cii yee ɓǝǝ a cii tǝgbana ɓal muŋta vãm mapãa mai pǝr moo kwakra ɗuu ga mor sal ne ko. 10 Ara ne sǝ̃ǝ ne guu gŋ tǝgbana mǝ dǝweri. Mor sǝ̃ǝ mai ara mo ne ko, mor ah ara ne swah ka cuu bone nyi dǝfuu fĩi dappe. 11 Goŋ ɓǝǝ no, ako ye angelos ma lwaa ɓǝ lak matǝ ɓoroo, a ɗii ne zah Yahuduen Abadon, a ɗii ne zah Grek Apolion, tǝgba faa: Paɓeɓfanne.
12 Bone patǝ vaŋno ah kal ɓe, bone camcam gwa tǝ yah gin fahfal ah faɗa.
13 So angelos patǝ yea ah ul kokõorĩi. Me laa kyaŋ pǝ̃ǝ gin wo ciŋ matǝ nai mo tǝ nyah cok joŋ syiŋ ma vãm kaŋnyeeri mai mo no pel Masǝŋ ge. 14 Kyaŋ ah faa ɓǝ nyi angelos patǝ yea ah mai mo ne kokõorĩi jolle: Mo wǝǝ angeloi matǝ nai mai mo gaara ra ɓo ne celeelu kah el Efrat malii kŋ myah o. 15 Wǝǝra angeloi matǝ nai myahe, mor zyeɓra suu kaa ɓo ne mor cok com ahe, ne zah'nan ahe, ne fĩi ah tǝkine syii ahe, mor ka ikra fah kǝ sai dǝfuu pǝ wulli. 16 Cuura pãa sooje ma yee tǝ pǝr nyi me, ara million temere gwa. 17 So pǝ fakwan ɓe, me kwo pǝr tǝkine za ma yee ahe, ɓaara mbǝro vãm ɓo pǝsyẽa tǝgbana wii, ne pǝkǝrãhmo tǝgbana coksǝŋ, ne pǝgbǝ̃ǝ tǝgbana gbǝ̃ǝ maɗalle, tǝtǝl pǝr ah ra tǝgbana tǝtǝl ɓolle, wii pǝ̃ǝ gin pǝ zah ɓǝǝ ne suŋwii tǝkine sulfer. 18 Bone matǝ sai mai ik fah kǝ sai dǝfuu pǝ wulli: Wii, suŋwii, tǝkine sulfer mai moo pǝ̃ǝra gin zah pǝr ah ra. 19 Mor swah pǝr ah a pǝ zah ɓǝǝ tǝkine sǝ̃ǝ ɓǝǝra. Sǝ̃ǝ ɓǝǝ a tǝgbana soo, ara ne tǝtǝlli, a cuura bone nyi dǝfuu ne ko.
20 Dǝfuu mai mo coŋ ɓo, za mai daŋ mo lwaara wuk ne bone matǝ sai mai ya, zyii soɓra fan mai mo joŋra ne suu ɓǝǝr a. Soɓra juupel wo coksyiŋ ne masǝŋ ma vãm kaŋnyeeri ne ma vãm solai ne ma vãm syẽ, ne tǝsalle, tǝkine kpuu ya. Fan marai ka gakra kwan cok ya, ka laara sok ya, ka syeera ya ta. 21 Zan ah zyii soɓra ɓǝ in wul a, soɓra joŋ kǝndaŋn a, soɓra joŋ ɓǝǝ tǝkine kiŋ nyin ɓǝǝ ya ta.
© Bible Moundang © Alliance Biblique du Tchad, 1996.
