Rut fyak sor 'wah Boas
1 No'omi a no ne zum wor ahe, dǝɓ ah pa joŋ yo, morsǝ̃ǝ tǝ vaŋno ye ne Elimelek, a ɗii ko ne Boas. 2 Rut Moabiyo faa nyi No'omi: Mo soɓ me ge kyãh 'wah ka me fyak sor fahfal dǝɓ mai moo ga joŋ gboŋgboŋ wo ɓe . No'omi zyii zah ah faa: Mo gyo, mǝlaŋ ɓe.
3 Rut kal ge 'wah ka fyak sor fahfal za ma cen sorre. Joŋ pejii kal ge pǝ 'wah mǝ Boas mai ako ye mo morsǝ̃ǝ tǝ vaŋno ne Elimelek.
4 Ne cok ah sǝ laŋ ka Boas ur gin yaŋ Betlehem ge dai ɓo. Faa nyi za ma cen sorre: Dǝɓlii mo yea ne we. So zyiira zah ah faa: Dǝɓlii mo ẽe mo. 5 Boas so fii dǝɓ yeɓ ah kapita za ma cen sorre: Mǝlaŋ zu ye mai ne? 6 Kapita za ma cen sor zyii faa: Mǝlaŋ Moabiyo yo. Gee sǝr Moab ge ne No'omi. 7 Fii ru faa: We soɓ me fyak sor ka me tai fahfal za ma cen sorre. Ge ɓo, tǝŋ joŋ yeɓ daga zah'nanne, ŋhaa zǝzǝ̃ǝko kaa ge sǝŋ 'yak ya.
8 Boas faa nyi Rut: Mo laa ɓe ne mǝlaŋ ɓe. Mo ge fyak sor 'wah maki ah ka, mo zol gin nyee ka, amma mo kaa ne wee ɓe maŋwǝǝ nyeeko. 9 Sai mo ẽe 'wah mai mo tǝ cenra, ka mo syee mor ɓǝǝra. Me faa nyi za yeɓ ka mo juura mo ka. Koŋ bii mo i mo ɓe, mo ge zah daŋ ne suu ɓo ka mo zwǝ bii mai za yeɓ mo bea ɓo. 10 So Rut kea ge sǝŋ ɗǝŋ zahpel ge tǝ sǝr faa: Me lwaa ɓǝ 'nyah mai pel ɓo nai mor fẽe ŋhaa ka mo waa kan lǝŋ ɓe nai ne? Ame laŋ me ye gwǝǝre. 11 Boas zyii zah ah faa: Me laa ɓǝ sãh mai mo joŋ wo magor ɓo fahfal wul wor ɓo ɓe. Mo soɓ pa ɓo ne ma ɓo tǝkine sǝr byaŋ ɓo, mo so kal ge wo za mai mo tǝ ra taa ya. 12 Dǝɓlii Masǝŋ Israel mo soo mo mor yeɓ ɓo. Reba ɓo baa ɓo cyõ wo Dǝɓlii mai mo ge ɓo tǝ kyeɓ ǝ̃ǝ mor yee ahe. 13 Rut faa: Mo soɓ me lwaa ɓǝ 'nyah pel ɓo cẽecẽe naiko, dǝɓlii ɓe. Mor mo wuu zahzyil ɓo nyi me, mo joŋ zahzyil mabyak ɓo laa ɓo pǝ'nyahre, ame laŋ me ka kǝsyil za yeɓ ɓo maŋwǝǝ ra laŋ ya.
14 Ne cok ren farel mo ge, Boas faa nyi Rut: Mo tǝɓ ge nyee mo re wolle, mo maa tǝwaa ge pǝ nãa. Rut kaa ge sǝŋ kah za ma cen sorre, Boas nyi sor ma raa ah nyi soŋ ta, kǝ̃ǝre, soɓ tǝcoŋ ahe. 15 Ne cok Rut mo so ur ka ga fyak sorre, Boas faa nyi za yeɓ ahe: We soɓ ko fyak ma kǝsyil sor ma bam ah ta, we cak ko ka. 16 We soɓ tǝtǝl sor 'mǝr ge sǝŋ ka mo lwaa fyakko, we lai ko ka.
17 Rut so fyak sor pǝ 'wah ŋhaa dai lilli, so ɗuu sor mai mo fyakke, joŋ tǝgbana zyemĩi tahsah jemma sai. 18 Ɓaŋ kal ge yaŋ ne ko, ge cuu fan mai mo fyakko nyi magor ahe, so cuu tǝcoŋ farel mai mo reko kǝ̃ǝ mo so soɓ ɓo nyi ta. 19 Magor ah fii ko: Mo ge fyak sor kẽe tǝ'nah ne? Mo joŋ yeɓ kẽne? Osoko dǝɓ mai mo foo ɓǝ ɓo. So cuu dǝɓ mai mo joŋko yeɓ wol ah nyi magor ah faa: Dǝɓ mai me ge joŋ yeɓ wol ah tǝ'nah a ɗii ne Boas.
20 No'omi faa nyi magor ah Rut: Osoko Dǝɓlii mai mo soɓ joŋ ɓǝ sãh ah wo za ma ne cee tǝkine za ma wul a. So faa: Dǝɓ ah ako ye zum ɓuu matǝ gwari, dǝlaŋ ma nen ren yaŋ yo. 21 Rut Moabiyo so faa nyi magor ahe: Dǝɓ ah so faa nyi me, me joŋ yeɓ ne za yeɓ 'min ŋhaa sai ka cera 'wah 'min daŋ vǝr ɓe. 22 No'omi faa nyi magor ah Rut: Mǝlaŋ ɓe, a pǝsãh ka mo kyãh ge ne wee ah maŋwǝǝre, mor ka za mo ge joŋra ɓe' wo ɓo pǝ 'wah maki ah ka. 23 Rut joŋ yeɓ ne wee Boas maŋwǝǝ naiko, fyak sor mor ɓǝǝ ŋhaa cok cen zyemĩi tǝkine alkamaari vǝr ne sõo. Rut so kaa ne magor ahe.
© Bible Moundang © Alliance Biblique du Tchad, 1996.
