Rut ne Boas pǝ cok ɗuu sorre
1 Magor ah No'omi faa nyi ko: Mǝlaŋ ɓe, me ga kyeɓ cok kal nyi mo, mor ka mo laa pǝ'nyahre. 2 Boas mai mo tǝ syee ne wee ah maŋwǝǝ zum ɓuu yo. Mo ẽe ne lil mai tǝ ga gee zyemĩi pǝ cok ɗuu sorre. 3 Mo er bii mo tah nǝmmi, mo ɓoo mbǝro ɓo masãhe, ka mo ge pǝ cok ɗuu sorre, amma mo cuu suu ɓo nyi ko ka, sai ka re farel tǝkine zwan fan vǝr ɓe. 4 Ne cok mo ge swǝko sǝŋ ɓe, ka mo ẽe cok mai mo ge swǝko ɓo gŋ kpẽe, ka mo ge swǝ ge sǝŋ mor ɓal ah mo zyiŋ fan tǝ ɓal ah ge lalle. A ga cuu fan mai ka mo joŋ nyi mo ba. 5 Rut zyii zah ah faa: Me ga joŋ fan mai mo faa ɓo nyi me daŋ.
6 So ur kal ge pǝ cok ɗuu sorre, ge joŋ tǝgbana mai magor ah mo faa nyi ko daŋ. 7 Boas re farelle, zwǝ, zahzyil ah laa pǝ'nyahre, so kal ge ka swan kah ɓol sorre. Rut syee ge 'yaŋ'yaŋ ge swǝ ge sǝŋ mor ɓal ah so zyiŋ fan tǝ ɓal ah ge lalle. 8 Ne kǝsyisuŋ dǝɓ ah kpiŋ ɗuu galle, so ẽe cok kah ahe, kwo madǝwin swǝ ɓo sǝŋ mor ɓal ahe. 9 So faa: Amo ye zune? Zyii zah ah faa: Ame ye mabyak ɓo Rut, mo jǝŋ jol mbǝro ɓo ge tǝ mabyak ɓo sa, mor amo ye zum ma ren yaŋ.
10 Boas so zyii faa: Dǝɓlii mo ẽe mo mǝlaŋ ɓe, amo so cuu ɓǝ sãh ɓo ge lal zǝzǝ̃ǝ kal ma kǝpel ne sãh ɓe. Mor mo kyeɓ wee tǝbanna masyak wala makǝ̃ǝ ya. 11 Zǝzǝ̃ǝ mo ɗuu gal kao mǝlaŋ ɓe. Fan mai mo tǝ fii daŋ me ga joŋ nyi mo, mor za yaŋ ɓuu tǝra ɓe, amo ye mawin sãhe. 12 Goŋga yo, ame ye pa mai mee gak re yaŋ ko. Amma dǝɓ ma ren yaŋ matǝ gwari ah kal me a no. 13 Mo swǝ nyee ne suŋ mai ɗao, ka tǝ'nan ne zah'nan mo tǝ 'yahko ka kan mo ɓe, ka a pǝsãhe, mo kanko. Amma mo 'yahko ka kan mo ya ɓe, tǝgbana Dǝɓlii mo no sǝŋ, ka me ga kan mo. Mo swǝ sǝŋ zah'nan mo cee ɗao.
14 So swǝ ge sǝŋ mor ɓal ah ŋhaa zah'nan ceeni. Hǝǝ ur ɓaa ka za ka tan dǝɓ ya ba. Mor Boas faa: Ɓǝ ah mo pǝ̃ǝ ge lal ka za mo tǝra madǝwin ge pǝ cok ɗuu sor nyee ɗǝ ka. 15 So faa nyi ko: Mo gbǝ zah godel mai mo wo ɓo ge nyeeno. Rut gbǝ zah ah ge nyi ko, so i sor nyi ko tahsah yea, ɓaŋ kan ge nyi tǝtǝlli, Rut so kal ge yaŋ ne ko. 16 Ne cok Rut mo ge dai wo magor ahe, magor ah so faa nyi ko: Joŋ ɗǝne mǝlaŋ ɓe? Rut so kee ɓǝ fan mai dǝɓ ah mo joŋ wol ah daŋ nyi ko. 17 Rut faa: I zyemĩi tahsah yea nyi ɓo me nyẽeno, mor faa: Mo pii soo ge lwaa magor ɓo ne jol kol ka. 18 No'omi faa: Mo kaa 'yak o mǝlaŋ ɓe, sai ka mo so laa in zah ɓǝ ah mo ga i ɓe. Mor dǝɓ ah ka kaa ga sǝŋ ya, sai ka ɓǝ ah vǝr tǝ'nah ɓe.
© Bible Moundang © Alliance Biblique du Tchad, 1996.
