Ɓǝ faa dǝworre
1 Me dan ge ɓo pǝ 'wah kpuu ɓe, zah gwa ɓe, wee ŋwǝǝ ɓe.
Me tǝ tai fan fuŋ 'nyah tǝkine zwah daŋ.
Me tǝ lah manǝm tǝnjwǝǝ tǝkine ren bik ahe.
Me tǝ zwan bii lee kpuu vin ɓe tǝkine wonni.
Ɓǝ faa ŋwǝǝre
We re o, za 'yah ki, we zwah o,
Ŋhaa ka 'yah mo tǝǝ we na yimmi.
Patǝ nai lǝŋni
Ɓǝ faa mawinni
2 Ne cok ka me nǝnǝm ɓo,
Zahzyil ɓe nǝ mǝ ah nǝm ya.
Me loo lom wee wǝǝ ɓe ge kǝ̃ǝ zahfah tǝ ɓe.
Ɓǝ faa dǝworre
Mo gbǝr zahfah nyi me, wee ŋwǝǝ ɓe, zah gwa ɓe, wandalla ɓe.
Mahm pǝ̃ǝ rĩi tǝtǝl ɓe ɓo mbãakãm.
Ɓǝ faa mawinni
3 Me wǝǝ fan wo suu ge lal ɓe,
Ka me so jin ɓaa fan ge wo suu kpǝ ne?
Me vãh ɓal ɓe ra ɓe,
Ka me so jin ii ne 'nahm kpǝ ne?
4 Wee wǝǝ 'yah ɓe maa jol ah nǝn zahfah ge yaŋ,
So zahzyil ɓe kal ne in yuŋni,
Mor ge kah ɓe gwari ɓe.
5 Me coŋ biŋ ka soɓ ko dan gin yaŋ o.
Me ur gbǝ fõo zahfah ne jolle,
Ka me sõm jol laŋ ɓo ne ɓǝrdi pǝzyil kpuu,
So bii ah tǝ zyer tǝwee jol ɓe ra ga sǝŋ.
6 Me gbǝr zahfah nyi wee wǝǝ sãh ɓe,
So me lwaa zol kal ɓe.
Koŋ laa kyaŋ ah i me ɓo no cam!
Me kyãh kyeɓ ko ŋhaa me lwaa ko ya,
Me sah ɗii ahe, amma zyii ɗii zah ɓe ya.
7 Za ma byak cok tǝgǝǝ yaŋ ne suŋ zyaŋra ne me,
Ira me ŋhaa kanra syim wo ɓe.
Za ma byakra yaŋ mai mo vuura korvuu ryaŋ ɓo ne ko ŋgǝ̃ǝra fan wo suu ɓe ge
lalle.
8 Me 'yah ka we faa nyi me, ŋwǝǝ Jerusalem,
We lwaa wee wǝǝ 'yah ɓe ɓe,
We ga faa nyi ko 'yah ah joŋ me ɓo na syemme.
Ɓǝ faa ŋwǝǝre
9 Ma kal ŋwǝǝ daŋ ne sãhe,
Wee wǝǝ sãh ɓo sye kal maki ah ra daŋ ne fẽe nai
ka ru haa zah nyi mo tǝ ɓǝ ah ne?
Ɓǝ faa mawinni
10 Wee wǝǝ ɓe a sãh worak worak,
So a pǝswahe.
Kǝsyil za ujenere ako gŋ vaŋno sǝ.
11 Cok nǝn ah a na vãm syẽ, a so pǝrwãhe.
Rĩi ah a tǝpit tǝpit,
A pǝfuu na tǝmgbuuri.
12 Nahnǝn ah ra a pǝsãh na matǝvaawandalla mai moo cwãara ma
zahbii jol el mai mo tǝ ɗuɗuu.
Pãa nahnǝn ah pǝfãi na wonni,
Tǝgbana kan ɓo ɓǝr fan mai dǝɓ moo rǝk wee fan masãh ah gŋ.
13 Oo ah ra a pǝsãh na 'wah mai fãa ma fuŋ 'nyah ah mo gŋ,
Ne zahban fan fuŋ manyeeki ah camcam daŋ.
Tǝkpuuzah ah a na vǝ̃ǝ, rǝŋ ɓo ne ɓǝrdi.
14 Jol ah ra pǝsãh syiusyiu,
A maa tǝgaa mai tǝsal masãh ah mo maa ɓo tǝl ahe.
Kee suu ah a na loŋ bal marwãh ahe,
So tǝsal ma ɗii ne safir moo yea ma wol ahe.
15 Ɓal ah ra na wǝǝdǝǝ yaŋ ma vuu ne tǝsal mafãi,
So uu ɓo pǝswah tǝ ɓal ah ma sǝŋ mo ɓaŋ ɓo ne vãm kaŋnyeeri.
A pǝsãh tǝgbana waa Liban mai kpuu bah mawah ah ra mo gŋ.
16 Zah ah moo zwan dǝɓ ne a pǝnikki.
Fan joŋ ah daŋ a 'nyah suu ɓe.
Wee wǝǝ ɓe a naiko, ŋwǝǝ Jerusalem.
© Bible Moundang © Alliance Biblique du Tchad, 1996.
