Ɓǝ faa ŋwǝǝre
1 Ma kal ŋwǝǝ daŋ ne sãhe,
Wee wǝǝ 'yah ɓo sye kal ge kẽne?
Zah gwa ɓo sye ɓaŋ fahlii makẽe kal ɓo ne?
Ru ga kyãh kyeɓ ko tǝkǝ̃ǝ ɓo.
Ɓǝ faa mawinni
2 Wee wǝǝ sãh ɓe kal ge ɓo pǝ 'wah kpuu ah kǝsyil fãa ma fuŋ 'nyah ra,
Tǝ pii ŋgaɓ fan ah ra gŋ,
So kaa ŋhǝǝ fãi fan ma fuŋ 'nyah ah ra ta.
3 Wee wǝǝ ɓe ako ye ma ɓee,
Ame laŋ me ye mǝ ahe,
A pii ŋgaɓ fan ah kǝsyil fãi fanne.
Patǝ dappe lǝŋni
Ɓǝ faa dǝworre
4 Wee ŋwǝǝ 'yah ɓe, mo pǝsãh na yaŋ Tirza,
Mo korel na yaŋ Jerusalem.
Mo pǝ ren gal na yaŋ maluu raiko.
5 Mo ɓaŋ nahnǝn ɓo gin tǝ ɓe,
Mor jinra tǝtǝl ɓo me pǝryak.
Rĩi ɓo a dǝdaa na ŋgaɓ sǝgwii mai mo tǝ ɗǝrra gin tǝgee Giliat ra gin sǝŋ.
6 Syel ɓo a pǝfãi rakkǝkǝ na ŋgaɓ pǝsǝ̃ǝ mai mo yeara cok vãh ahe, ara gwa gwa ne ɓal daŋ.
Koo vaŋno kǝsyil ɓǝǝ muŋ ya.
Ara pǝsãh zahki tǝɗe' daŋ.
7 Oo ɓo ra a sãh pǝzyil fan rii tǝtǝl ɓo gin lal felfel.
8 Goŋ gak yea ne ŋwǝǝ jemma yea,
Mǝǝ byak jemma nama,
So ne woi pǝpãa ta.
9 Amma ma ɓee mai me tǝ 'yah pǝlli a vaŋno to,
A pǝsãh na matǝvaawandalla.
A jol mah ah vaŋno sǝ,
Mam ãm ko ɓo,
Ŋwǝǝ daŋ a ẽera ko so a yiira ko ta.
Ŋwǝǝ goŋ ne mǝǝ byak ah a ɗǝǝra lǝŋ cor ko ne ko.
10 Mǝlaŋ kẽe ye mabǝ̃ǝ a kwan tǝgbana com ye tǝ zoo gin ko ne?
A pǝsãh na fĩi, a zaizai na comme.
11 Me kal ge pǝ 'wah kpuu amand,
Ka ẽe wee kpuu kah elle,
Ka ẽe ɗah kpuu vin a juu goo fuu o ne,
Tǝkine ẽe fãi kpuu grenadin ra.
12 Suu tǝ coo me coo,
Mo kǝǝ zahzyil ɓe ɓo ka tǝ gak kal a jol 'yahe,
Tǝgbana pa ɗaŋ muŋta sal moo 'yah ga salle.
Ɓǝ faa ŋwǝǝre
13 Mǝlaŋ Sulam, mo dǝdaa, mo dǝdaa,
Ka ru ẽe daa ɓo.
Ɓǝ faa mawinni
We 'yah me dǝdaa ka we ẽe kǝsyil za mai mo uura ɓo ka ẽe cok
mor fẽene?
© Bible Moundang © Alliance Biblique du Tchad, 1996.
