Dǝɓlii ɗii zan ah ka mo pii soora ge wol ahe
1 Dǝɓlii faa ɓǝ nyi profeto Zakarias we Berekia we Iddo pǝ fĩi patǝ nama, ne syii patǝ gwa ah Darius mo kaa goŋ sǝr Persia ɓo. 2 Dǝɓlii ma ne swah daŋ faa nyi Zakarias ka mo faako nyi zana: Ame Dǝɓlii me ɓaŋ kpãh tǝtǝl pa ɓii lii ra pǝ'manne. 3 Amma zǝzǝ̃ǝko me tǝ faa nyi we, we pii soo ge wo ɓe, ame laŋ me pii soo ge wo ɓii ta. 4 We yea tǝgbana pa ɓii lii ra ka, mor profetoen ma kǝpel faara ɓǝ ɓe nyi ra, faara: We soɓ fahlii ɓe' ɓii ne yeɓ ɓe' ɓiiri, amma zyii ɓaŋra syiŋ ɓǝ faa ɓe, wala laa zah ɓe ya. 5 Pa ɓii lii ra ara kẽe zǝzǝ̃ǝ ne? Profetoen marai ara no sǝŋ ne cee ba ne? 6 Me lai pa ɓii lii ra ne ɓǝ lai ɓe ne zah za yeɓ ɓe profetoen ɓe ra, amma syẽara ra, so laara bone mor ahe. Fahfal ah so toora bii, so tǝra, ame Dǝɓlii ma ne swah daŋ, me ŋgoŋ kiita ɓo tǝ ɓǝǝ tǝgbana fan joŋ ɓǝǝra, tǝgbana mai me foo ɓo ka joŋni.
Profeto Masǝŋ kwo pǝrri
7 Ne syii patǝ gwa ah Darius mo kaa goŋ ɓo, ne zah'nan jemma gwa tǝtǝl nai pǝ fĩi jemma tǝtǝl vaŋno ahe (tǝgba faa: fĩi Sebat), Dǝɓlii faa ɓǝ nyi me ne fakwan ne suŋni. 8 Me kwo angelos yee ɓo tǝ pǝr masyẽ ahe, uu ɓo ne kǝsyil kpuu fǝfãhṽai pǝ cok tǝforoŋ, so pǝr masyẽ ne maŋgahɓ ne mafãi uura ɓo fahfal ahe. 9 So me fii ko faa: Dǝɓlii ɓe, pǝr marai ɓǝ ah 'yah cuu ɓǝ fẽene? Zyii zah ɓe faa: Me ga cuu mor ah nyi mo. 10 Dǝɓlii pee za pǝr rai ɓo ka kyãh wo sǝr ẽere.
11 So faara nyi angelos: Aru kyãh wo sǝr ne lii ah daŋ ɓe, ru lwaa sǝr ne lii ah daŋ kaa ɓo jam, ɓǝ ki kǝka. 12 Angelos so faa: Dǝɓlii ma ne swah daŋ, mo ɓaŋ kpãh ɓo tǝ yaŋ Jerusalem ne yaŋ maluu ma pǝ sǝr Yuda daŋ ɓo syii jemma rǝŋ zǝzǝ̃ǝko. Ko mo ga kwo syak tǝ ɓǝǝ nekẽne? 13 Dǝɓlii zyii ɓǝ zah angelos ne ɓǝ ma'nyah ahe, 14 so angelos ah faa nyi me: Mo ge cuu ɓǝ mai Dǝɓlii ma ne swah daŋ mo faa ɓo, faa: Ame ne 'yah Jerusalem yaŋ ɓe matǝdaŋdaŋ pǝlli. 15 Ame ɓaŋ kpãh pǝ'man tǝ za mai mo kaara ɓo jam. So ne cok me tǝr kpãh ɓe me ɓaŋ ɓo tǝtǝl za ɓe, za mai so cuura bone nyi za ɓe pǝ'manne. 16 Mor ahe, me pii soo ge ɓo wo Jerusalem ka me kwo syak tǝ yaŋ ahe. Yaŋ juupel ɓe ga zyeɓɓe, so a ga vuura yaŋ Jerusalem faɗa.
17 Angelos so faa nyi me: Mo cuu ɓǝ mai Dǝɓlii ma ne swah daŋ mo faa: yaŋ ah maluu ra daŋ a ga yea jam faɗa, a ga joŋ yaŋ Jerusalem pǝswahe, a ga joŋ yaŋ ah na ma syak ah faɗa.
Profeto Masǝŋ kwo ciŋ
18 Pǝ fakwan ahe, me ɓaŋ nahnǝn me kwo ciŋ nai. 19 So me fii angelos me faa: Ɓǝ ah 'yah ka cuu ɓǝ fẽene? Zyii zah ɓe faa: Ciŋ ah ra a cuu sǝr maswah ah ra mai mo myahra za sǝr Yuda ne za Israel tǝkine za yaŋ Jerusalem.
20 Fahfal ah Dǝɓlii so cuu za cwak nyi me nai. 21 Me so fifii faa: Za marai ge tǝ joŋra fẽene? So angelos zyii zah ɓe faa: Zan ah gera ɓo ka nǝǝ zahzyil nyi za sǝr mai mo jokra sǝr Yuda mo myahra zan ah ɓo.
© Bible Moundang © Alliance Biblique du Tchad, 1996.
