1 Dǝɓlii ma ne swah daŋ faa: Ne cok zah'nan ah mo ge ɓe, lak bii ga gbǝrri, mor ka vãh faɓe' tǝkine ɓǝ 'nahm masǝŋ ki cam daŋ wo morsǝ̃ǝ David ne za yaŋ Jerusalem ga lalle. 2 Ne cok ah me ga vǝr tǝɗii masǝŋ ki ra gin wo sǝrri. Koo dǝɓ vaŋno laŋ ka ga foo ɓǝ ah yao. Me ga vǝr profetoen maber gin wo sǝr ta, me ga nĩi 'yah syee mor masǝŋ ki ra pǝ zahzyil za ga lalle. 3 So koo dǝɓ vaŋno kǝsyil ɓǝǝ mo coŋ mo so kal tǝ faa ɓǝ na profeto kpǝ ɓe, pa ka syak ah ne mah ah a ga faara nyi ko: Mo nǝn pǝkoŋ wulli, mor mo tǝ gwah ber ne cuu ɓǝ pǝ tǝɗii Dǝɓlii. Ne cok mo so tǝ faa ɓǝ na profeto Masǝŋ ɓe, pah ah ne mah ah a ga ira ko pǝ wulli. 4 Ne cok zah'nan ah mo ge ɓe, koo profeto Masǝŋ vaŋno ka ga yii suu tǝ ɓǝ fakwan ah ra ya, wala ka ga ɓoo mbǝro na profeto Masǝŋ ka gwah ber ne yao. 5 Jeertǝ dǝɓ ah ga faa: Ame ye ka profeto Masǝŋ ya, ame ye dǝɓ pǝǝ 'wahe, ame ɗǝǝ 'wah ah ɓo daga laŋ ɓe dai. 6 So dǝɓ ki mo fii ko faa: Suŋnwãh fẽe ma zahbii ɓo ne ɓe, a ga zyii faa: Me lwaa nwãh ah yaŋ bai ɓe.
Masǝŋ faa ka mo ira pakǝpii fan ah pǝ wulli
7 Dǝɓlii ma ne swah daŋ faa: Amo kafahe, mo ur mo ce pakǝpii mai mo tǝ joŋko yeɓ ɓe. Mo i ko pǝ wulli, ka pǝsǝ̃ǝ ah mo myahra. Me ga ruu sal ne za ɓe. 8 Pǝ sǝr ne lii ah daŋ, gwa ma pǝzyil sai za ga wukra, 9 so me ga lii tǝcoŋ ah mai mo coŋ ɓo sǝŋ ne cee, ka zyeɓ ra tǝgbana wii moo zyeɓ vãmme. Me ga lii ra tǝgbana za moo lii vãm kaŋnyeeri ka yea pǝsãhe. A ga juura pel wo ɓe, so me ga laa juupel ɓǝǝra, me ga faa nyi ra, ara ye za ɓe, so a ga faara, ame ye Masǝŋ ɓǝǝra.
© Bible Moundang © Alliance Biblique du Tchad, 1996.
