Zyeɓ suu ka vuu yaŋ Masǝŋ
(1 ZaG 5:1-8)1 Salomo foo ɓo ka vuu yaŋ Masǝŋ ka juupel wo Dǝɓlii gŋ, so ka vuu yaŋ goŋ mǝ ahe . 2 Rǝk za 70.000 ka mo ɓaŋra faswaare, rǝk za mai ka mo zyeɓra tǝsalle ara 80.000, rǝk za 3.600 ka mo yeara na kapita ma foo yeɓɓe.
3 Salomo pepee ge wo Hiram goŋ sǝr Tirus faa: Mo joŋ yeɓ ne me tǝgbana mo joŋ ne pa ɓe goŋ David ne cok mai mo nyi kpuu bah nyi ko lea mor ka vuu yaŋ goŋ ahe. 4 Ame tǝ vuu yaŋ Masǝŋ mor ka yii Dǝɓlii Masǝŋ ɓe gŋ. Cok ah a ga yea cok matǝdaŋdaŋ, ka ame ne za ɓe daŋ ru juupel wol ah gŋ, ru tǝǝ ɓǝrdi ma fuŋ 'nyahre, ru nyi farel ma nyi nyi Masǝŋ cẽecẽe gŋ, ka ru joŋ syiŋ suŋwii wol ah gŋ zah'nan tǝkine lil daŋ ne com 'yak daŋ ta, ka fĩi mafuu mo ciŋ ɓe, ru joŋ fĩi ah gŋ tǝkine zah'nan matǝdaŋdaŋ manyeeki ah ra daŋ ka yii Dǝɓlii Masǝŋ ɓuu gŋ. Mor faa ɓo nyi za Israel ka mo joŋra nai ga lii ga lii. 5 Ame foo ɓo ka me vuu yaŋ Masǝŋ ma'man ahe, mor Masǝŋ ɓuu pǝ'man kal masǝŋ manyeeki ah ra ɓe. 6 Amma dǝɓ gak vuu yaŋ kal nyi Masǝŋ ɗǝne? Mor coksǝŋ ne lii ah daŋ laŋ kii nǝn kal ah ya. Mai me tǝ ga vuu, me ga vuu cok tǝǝ ɓǝrdi ye wol ah to. 7 Zǝzǝ̃ǝko, me 'yah mo pee pa fatan mai mo tǝ fahlii joŋ yeɓ ne vãm kaŋnyeeri, vãm solai, vãm syẽ tǝkine vãm fuu daŋ ɓo, so mo tǝ kaŋ zyim ma kǝrãhmo ne mafuu tǝ it-it ah tǝkine masyẽ tǝ nyaknyak ah ɓo daŋ gee me. Ka dǝɓ ah mo joŋko yeɓ ne za tan zyeɓ fan ma sǝr Yuda ne ma yaŋ Jerusalem daŋ pa ɓe David mo syen ra ɓo. 8 Me tǝ ɓe, za ɓo tǝra cen kpuu ɓo pǝlli, mor maiko mo pee kpuu bah ne mǝŋgiŋ tǝkine keeŋgai ma Liban daŋ gee me. Me ga pee za ɓe ka mo ge joŋra yeɓ ne za ɓo ta, 9 ka mo ceera kpuu pǝlli, mor yaŋ Masǝŋ mai me foo ɓǝ ah ɓo ka vuu a ga yea pǝ'manne, a ga yea pǝyǝkki. 10 Me ga pee farel ga nyi za yeɓ ɓo, alkamaari col 20.000, zyemĩi col 20.000 ta. Me ga pee bii lee kpuu vin liitǝr 400.000, nǝm tǝbaakãm liitǝr 400.000 ta.
11 Hiram goŋ Tirus ŋwǝǝ leetǝr pee ge nyi Salomo faa: Dǝɓlii tǝ 'yah zan ahe, mor ah ɓaŋ mo kan goŋ ɓǝǝ ɓo ne ko. 12 Osoko Dǝɓlii Masǝŋ Israel mai mo joŋ sǝŋ ne sǝrri. Mor nyi we ma ne tǝtǝl ne yella tǝkine fatan nyi goŋ David, zǝzǝ̃ǝko foo ɓǝ ka vuu yaŋ mor Dǝɓlii, ne yaŋ goŋ mǝ ah daŋ. 13 Me pee pa fatan ma ne tǝtǝl ma tan zah yeɓ camcam ɓo no ga nyi mo, a ɗii dǝɓ ah ne Huram. 14 Mah ah morsǝ̃ǝ ban Dan yo, pam dǝɓ sǝr Tirus yo. Tǝ zah yeɓ ma joŋ ne vãm kaŋnyeeri, vãm solai, vãm syẽ, vãm fuu ne tǝsal tǝkine kpuu ɓo no cam. Tǝ kaŋ syim mafuu tǝ it-it ah ne masyẽ tǝ nyaknyak tǝkine marwãh ah ɓo pǝlli ta. A gak joŋ zahban fan mai dǝɓ moo cee wo tǝsal ne cel daŋ, wala ma ne fan ki, koo mo fooko ɓǝ foto fẽene ka joŋ daŋ a gak joŋni. A ga joŋko yeɓ ne za yeɓ ɓo tǝkine mai mo joŋra yeɓ nyi pa ɓo goŋ David. 15 Zǝzǝ̃ǝko, mo pee alkamaari ne zyemĩi ne bii lee kpuu vin ne nǝm tǝbaakãm gee ru tǝgbana mai mo faa ɓǝ ah ɓo. 16 Ru ga cee kpuu bah mai mo tǝ waa Liban daŋ nyi mo, tǝgbana mo 'yahe, ru ga bam ga wo ki ne salle, ru ga woo rǝk tǝ mabii ka bii mo woo ge Joppe ne ko, ka we woo gŋ ge Jerusalem ne ko.
Tǝŋra mor vuu yaŋ Masǝŋ
(1 ZaG 6:1-38)17 Goŋ Salomo ŋwǝǝ za gwǝǝ mai mo kaara ɓo pǝ sǝr Israel daŋ fahfal ŋwǝǝ ah mǝ pah ah David mo ŋwǝǝre. Pãa za gwǝǝ mo kaa ɓo gŋ daŋ a 153.600. 18 Ŋgee za gin gŋ 70.000 mor ka ɓaŋ faswaare, za 80.000 ka ga zyeɓra tǝsal tǝ waare, rǝk za 3.600 ka mo yeara na kapita ma foo yeɓɓe.
© Bible Moundang © Alliance Biblique du Tchad, 1996.
