Joakas kaa goŋ Yuda
(2 ZaG 23:30-35)1 Za sǝr Yuda ɓaŋra Joakas we Josias syeera nǝm tǝl ah kan goŋ ne yaŋ Jerusalem. 2 Ne cok Joakas mo kaa goŋ, ka joŋ syii ɓo jemma gwa tǝtǝl sai, kaa goŋ yaŋ Jerusalem fĩi sai. 3 Neko goŋ sǝr Egiɓ ge gbǝ ko, kan gǝraama tǝ za sǝr Yuda ka mo soora vãm solai nǝn kilo 3.500 ne vãm kaŋnyeeri nǝn kilo 37 tǝl ahe. 4 Neko ɓaŋ Eliakim naa mah Joakas kan goŋ sǝr Yuda ne ko, so fer ɗii ah ɗii ne Jojakim. Neko ɓaŋ Joakas kal ge fah sǝr Egiɓ ne ko.
Jojakim kaa goŋ Yuda
(2 ZaG 23:36–24:7)5 Ne cok Jojakim mo kaa goŋ sǝr Yuda, ka joŋ syii ɓo jemma gwa tǝtǝl dappe, kaa goŋ yaŋ Jerusalem syii jemma tǝtǝl vaŋno. Jojakim joŋ faɓe' wo Dǝɓlii Masǝŋ ahe. 6 Nebukanezar goŋ sǝr Babilon ge ɗaŋ sǝr Yuda. Gbǝ Jojakim, ɓoo celeelu nyi jol kal ge Babilon ne ko. 7 Nebukanezar woo fan manyeeki ah ɓǝr yaŋ Masǝŋ kal ne ge rǝk ɓǝr yaŋ goŋ ah sǝr Babilon. 8 Fan ma ren swãa ah ne ɓǝɓe' mai Jojakim mo joŋ daŋ, ɓǝ ah ŋwǝǝ ɓo pǝ ɗerewol Ɓǝ Za Goŋ Israel ne Yuda. Wel ah Jojakin kaa goŋ pǝ cok ahe.
Jojakin kaa goŋ Yuda
(2 ZaG 24:8-17)9 Ne cok Jojakin mo kaa goŋ sǝr Yuda, ka joŋ syii ɓo jemma tǝtǝl nama, kaa goŋ yaŋ Jerusalem fĩi sai. Jojakin joŋ faɓe' wo Dǝɓlii pǝlli. 10 Cok zah bam mo ge joŋ, goŋ Nebukanezar ɓaŋ Jojakin kal ge sǝr Babilon ne ko, woo fan sãh mai mo yaŋ goŋ daŋ belbelle. So Nebukanezar ɓaŋ Sedekias zum Jojakin matǝ gwari kan goŋ sǝr Yuda ne ko yaŋ Jerusalem .
Sedekias kaa goŋ Yuda
(2 ZaG 24:18-20)11 Ne cok Sedekias mo kaa goŋ sǝr Yuda, ka joŋ syii ɓo jemma gwa tǝtǝl vaŋno, kaa goŋ yaŋ Jerusalem syii jemma tǝtǝl vaŋno. 12 Joŋ faɓe' wo Dǝɓlii Masǝŋ ahe, zyii ka wonsuu ah pel profeto Jeremias mai mo tǝ faa ɓǝ Dǝɓlii nyi ko ya.
Yaŋ Jerusalem leere
(2 ZaG 25:1-21)13 Comki Sedekias haa zah pel goŋ Nebukanezar pǝ tǝɗii Masǝŋ faa zye ga laa zah ahe. Amma fahfal ah so ŋwookyaŋ ne ki, yer zahzyil ahe, zyii ka toobii ka pii soo gin wo Dǝɓlii Masǝŋ Israel a. 14 So zaluu sǝr Yuda, za joŋzahsyiŋ ne za pãa daŋ, a joŋra faɓe' tǝgbana mǝ za mai mo kaa ryaŋ ra ɓo, a juura pel wo masǝŋ ki ra, ɓeɓra yaŋ Masǝŋ mai Dǝɓlii ne suu ah ye mo joŋ ɓo daŋdaŋ. 15 Dǝɓlii Masǝŋ pa ɓǝǝ lii ra, a pee profetoen ah gin wo ɓǝǝ ka lai ra, mor tǝ kwan syak tǝ zan ah tǝkine yaŋ ahe. 16 Amma a joŋra kyẽm ne zapee ahe, syẽara ɓǝ Masǝŋ, syakra profetoen ah ra, ŋhaa in zah ah Dǝɓlii ɓaŋ kpãh tǝ zan ah pǝ'manne, gak ka rõm yao.
17 Dǝɓlii pee goŋ sǝr Babilon ge ik wee tǝbanna sǝr Yuda ge lalle, koo mo lwaara ra ɓǝr yaŋ Masǝŋ laŋ, ikra ra ge lal ta. Ikra wee tǝbanna, wee maŋwǝǝre, za maluuri, za ma ne syemme, ne za matam tǝ gojok gojok daŋ, koo kwo syak tǝ dǝɓ vaŋno ya. Masǝŋ soɓ ra ge mor jol ahe. 18 Goŋ sǝr Babilon woo fan mai mo ɓǝr yaŋ Masǝŋ daŋ, fan masãh ah mai mo yaŋ Masǝŋ ne joŋ mai mo jol goŋ ne zaluu pel ah ra daŋ, woo kal ge fah sǝr Babilon ne ko. 19 So ɓaa wii nyi yaŋ Masǝŋ, ne yaŋ Jerusalem ne yaŋ goŋ tǝkine fan sãh mai mo gŋ daŋ, so dah ɓaale yaŋ ah ge sǝŋ ta. 20 Za mai za mo lwaa ik ra pǝ wul a daŋ, so woo ra kal ge sǝr Babilon ne ka mo joŋra byak nyi ko tǝkine morsǝ̃ǝ ah ra, ŋhaa dai zah'nan mai goŋ sǝr Persia mo ge urri. 21 Ɓǝ ah joŋ baa ge cok ah tǝgbana mai Dǝɓlii mo faa ɓǝ ah kǝpel ne zah profeto Jeremias, faa: Sǝr ah ga ciŋ cok kol syii jemma rǝŋ tǝ ɓǝ mai we ka zyii gban zah'nan com 'yak ya.
Goŋ Kirus nyi fahlii nyi Yahuduen ka mo pii soora
(Ezr 1:1-4)22 Ne syii patǝ vaŋno ah Kirus mo kaa goŋ sǝr Persia ɓo ne ko, Dǝɓlii ur zahzyil ahe, lai ɓǝ pǝ sǝr ahe, so pee ɓǝ ah ne zah tǝkine ɗerewol kal ge pǝ sǝr goŋ ah daŋ ka za mo keera. Fan ah joŋ nai mor ka baa ɓǝ mai Dǝɓlii mo faa ɓo ne zah profeto Jeremias. Kirus pea ɗerewol kal ge pǝ sǝr goŋ daŋ (ka mo keera)
23 Ɓǝ mai Kirus goŋ sǝr Persia mo faa a naiko: Dǝɓlii Masǝŋ ma coksǝŋ ɓaŋ me kan goŋ ɓo ne tǝ za sǝr daŋ, nyi fahlii nyi me, ka me vuu yaŋ mor ah yaŋ Jerusalem pǝ sǝr Yuda. Zǝzǝ̃ǝ awe za mai we ye za Masǝŋ daŋ, we ge gŋ ŋhaako. Masǝŋ mo yea ne we.
© Bible Moundang © Alliance Biblique du Tchad, 1996.
