Eẽ Masǝŋ tǝ ɓǝ laa zahe
(Lew 26:3-13CuuƁ 7:12-24)1 We laa zah Dǝɓlii Masǝŋ ɓii ne goŋga ɓe, so we tǝ syee mor ɓǝ lai ah ra daŋ mai me faa ɓo nyi we tǝ'nah ɓe, a ga joŋ we pǝyǝk kal zahban manyeeki ah ra daŋ mo tǝ sǝrri. 2 We laa zah Dǝɓlii Masǝŋ ɓii ɓe, ẽe mai daŋ a ga yea tǝtǝl ɓiiri:
3 Dǝɓlii ga ẽe yaŋ ɓii ra, ne 'wah ɓiiri. 4 Dǝɓlii ga ẽe we, we bem wee pǝlli, a ga joŋ fakpãhpǝǝ ɓii joŋ pǝlli, a ga joŋ dǝǝ ɓii ne gwii ɓii ra ɓoo pǝpãare.
5 Dǝɓlii ga ẽe sor ɓii ra, tǝkine farel mai wee joŋ ne sorre.
6 Dǝɓlii ga ẽe fan mai daŋ wee joŋni.
7 Ne cok za syiŋ ɓii mo ge tǝ ruura sal ne we ɓe, Dǝɓlii ga ik ra. A ga pǝ̃ǝra tǝ fahlii tǝ vaŋno ka ruu sal ne we, amma a ga ɗuura pel ɓii kal ne fahlii camcam rǝŋ.
8 Dǝɓlii Masǝŋ ɓii a ga ẽe yeɓ jol ɓii wee joŋni, a ga bar cel ɓii ra ne sor gǝɓgǝɓ. A ga ẽe we pǝ sǝr mai mo tǝ nyi nyi we zǝzǝ̃ǝko.
9 We laa zah Dǝɓlii Masǝŋ ɓiiri, we tǝ joŋ fan mai daŋ mo faako ɓǝ ah ɓo nyi we ɓe, a ga joŋ we ciŋ za mǝ ahe, tǝgbana mai mo faako ɓǝ ah ɓo. 10 So za daŋ a ga kwora, Dǝɓlii nǝǝ we ciŋ za mǝ ah ɓo ne ko, so a ga ɗuura gal ɓiiri. 11 Dǝɓlii ga nyi wee nyi we pǝlli, a ga nyi dǝǝ nyi we pǝlli ta, so a ga joŋ fakpãhpǝǝ ɓii joŋ pǝlli, pǝ sǝr mai mo faako ɓǝ ah ɓo nyi pa ɓii lii ra ka nyi nyi we. 12 A ga pee bam daga coksǝŋ pǝ yaŋ rǝk fan ah malii tǝ gin sǝŋ ne cok ahe, a ga ẽe yeɓ jol ɓii wee joŋ daŋ, so we ga nyi val nyi za ki, amma ma ɓii we ka ga ɓaŋ val jol za ki ya. 13 Dǝɓlii Masǝŋ ɓii a ga joŋ we na zaluu kǝsyil za sǝrri, we ka yea fahfal zan a. We tǝ syee mor ɓǝ lai ah ra mai me faa ɓo nyi we tǝ'nah daŋ ɓe, Dǝɓlii Masǝŋ ɓii ga joŋ we na za ma pel kǝsyil za sǝrri, we ka ga yea fahfal zan a, cẽecẽe we ga pelle, we ka tǝr fahfal kpee ya. 14 Amma we zǝǝ tǝ ɓǝ lai ah ra koo biŋ ka, we juupel wo masǝŋ ki ra ka, we yii ra ka ta.
Reba bai laa zahe
(Lew 26:14-46)15 Amma we laa zah Dǝɓlii Masǝŋ ɓii ya, we syee mor ɓǝ lai ah ra mai me faa ɓo nyi we tǝ'nah ne goŋga ya ɓe, fan maɓe' ah marai daŋ a ga joŋ wo ɓiiri:
16 Dǝɓlii ga pee tǝkẽawãk ge tǝ yaŋ ɓii ra, ne 'wah ɓiiri. 17 Dǝɓlii ga pee tǝkẽawãk ge tǝ sor ɓii ne farel mai daŋ wee joŋ ne sorre.
18 Dǝɓlii ga joŋ zah tǝkẽawãk tǝ ɓii a ga nyi wee nyi we biŋ, fakpãhpǝǝ ɓii ka ga joŋ pǝlli ya, we ka yea ne dǝǝ ne gwii daŋ pǝlli ya ta.
19 Tǝkẽawãk Dǝɓlii ga yea tǝ fan daŋ wee joŋni.
20 We joŋ fan maɓe' ahe, so we soɓ Dǝɓlii ɓoo ɓe, a ga pee ɓeɓ ge tǝ ɓiiri, a ga joŋ tǝtǝl jin we pǝryak, we ga lwaa gaɓ pǝ fan daŋ mai wee joŋni, ŋhaa sai ka we vǝr gwari tǝɗe' sǝ ɓe. 21 Dǝɓlii ga pee syem maɓe' ah ge tǝ ɓii ɓǝrki ɓǝrki ŋhaa sai ka dǝɓ vaŋno kǝsyil ɓii laŋ ka ga coŋ pǝ sǝr mai we tǝ ga gŋ ka ren a. 22 Dǝɓlii ga pee syem maɓe' ma zǝǝ za ge tǝ ɓiiri, ne fabaani, tǝkine syem tǝtǝl 'wahe, so a ga pee syem camcam ge ka ɓeɓ fakpãhpǝǝ ɓii ta. Ɓeɓ mai daŋ a ga ge tǝ ɓiiri, ŋhaa sai ka we wuk ɓe. 23 Bam ka ga tǝ ya, sǝr ɓii ga yea pǝyak tǝgbana vãmme. 24 Dǝɓlii ga pee ɓǝm ne tǝkuu pǝlli tǝ ge sǝŋ zahwaa bamme, ŋhaa sai ka we vǝr ɓe.
25 Dǝɓlii ga soɓ za syiŋ ɓii kaa kacella tǝ ɓiiri. We ga pǝ̃ǝ ruu sal ne ra ne fahlii tǝ vaŋno, amma we ga ɗuu pel ɓǝǝ tǝ fahlii camcam rǝŋ. Ne cok za sǝr daŋ mo kwora fan mai mo so joŋ ɓo wo ɓii ɓe, gal ga re ra. 26 Ne cok we wuk ɓe, juu ne fafyãh cok daŋ a ga gera, a ryakra wul ɓiiri, dǝɓ ma nĩi ra tǝ wul ɓii ga lal ka ga yea ya. 27 Dǝɓlii ga pee fabaa maɓe' ah ge tǝ ɓii tǝgbana mai mo pee ge tǝ za sǝr Egiɓ ɓaaɓe. A ga pee fabaa maki ah ne syem fan suu, tǝkine tǝgbiŋ ge tǝ ɓiiri, amma syiŋ ma laɓ ah ra ka ga yea ya. 28 Dǝɓlii ga joŋ ɓǝ foo ɓii ka yea ya, we ga rǝ̃ǝ, tǝtǝl ga jin we. 29 We ga kyãh ne com kǝsyitǝtǝl rǝ̃ǝ cok kpakpa na rǝ̃ǝ kyeɓ fahlii, amma we ka ga lwaa fahlii ya. We ka ga lwaa jam pǝ fan mai wee joŋ ya. Za syiŋ ɓii ga gaɓra we zah'nan daŋ, a ga woora fan jol ɓiiri, so pa ma gbah jol ɓii gŋ ka ga yea ya.
30 Mo ga saa wee ŋwǝǝ ka kanne, amma dǝɓ ki ye ga swǝ ne ki, mo ga vuu yaŋ, amma mo ka ga kaa ɓǝr ah ya, mo ga pea 'wah kpuu vin, amma mo ka ga re lee ah ya. 31 A ga ŋgoŋra dǝǝ ɓo ne nahnǝn ɓo, amma mo ka lwaa nǝǝ ah re ya. A ga nĩira korro ɓo ne nahnǝn ɓo kal ne ko, ka so jinra ge nyi mo ne ya. Za syiŋ ɓo ga nĩira gwii ɓo, pa ma gbah jol ɓo gŋ ka ga yea ya. 32 A ga nyira wee ɓii mawǝǝ ne maŋwǝǝ nyi za gwǝǝ kal ne ko, we ga kwo ne nahnǝn ɓiiri, zah'nan daŋ we ga kan nahnǝn tǝ fahlii byak ka wee ɓii mo piira soo ge, amma we ka gak ya. 33 Za gwǝǝ ga woora fakpãhpǝǝ ɓii mai we joŋ yeɓ ah pǝgaɓ kal ne ko, amma ma ɓii we ka ga lwaa fan ki ya, sai gaɓ ne bone to. 34 Bone mai we tǝ laani a ga joŋ tǝtǝl jin we. 35 Dǝɓlii ga soɓ fabaa maɓe' ah gin bar ɓal nyi we, nwãh ah ka gak laɓ ya. A ga bar we daga tǝtǝl ŋhaa a dai ɓal sǝŋ.
36 Dǝɓlii ga woo we ne za goŋ ɓii daŋ kal ga sǝr za ki ne ko, pǝ cok mai awe ne pa ɓii lii ra daŋ we tǝ taa ya. We ga joŋ mor masǝŋ ki ra ma zyeɓ ne kpuu ne tǝsal gŋ ŋhaako. 37 Pǝ sǝr camcam mai Dǝɓlii mo tǝ ga myah we ga gŋ, za mo kwora we ɓe, a ga kaara gǝriŋ tǝ ɓǝ fan mai mo joŋ ɓo wo ɓiiri, a ga tǝǝra we, a syakra we.
38 We ga ruu nah fan ga sǝŋ pǝ'manne, amma we ga lwaa fagwahl biŋ nai sye, mor tǝzyee ga re fakpãhpǝǝ ɓiiri. 39 We ga pea kpuu vin, we ga pǝǝ mor ah pǝsãh ta, amma we ka ga lwaa lee ah ŋhǝǝ, wala ka zwan bii ah ya, mor tǝkaa ga ɓeɓ lee ahe. 40 Kpuu tǝbaakãm a ga joŋ pǝ cok daŋ pǝ sǝr ɓiiri, amma we ka ga lwaa nǝm ah ya, mor lee tǝbaakãm daŋ a ga yak belbelle. 41 We ga bem wee wǝǝ ne wee maŋwǝǝ daŋ, amma we ka ga yea ne ra ya, mor za syiŋ ɓii ga gbah ra kal ne ko. 42 Kpuu ma reren mai we pea ɓo, ne fakpãhpǝǝ manyeeki ah daŋ viviŋ ga ɓeɓɓe.
43 Za gwǝǝ mai mo ge kaara ɓo pǝ sǝr ɓii a gara pelle, amma ma ɓii we ga tǝr ga fahfalle. 44 We ga woo val lak jol ɓǝǝra, amma we ka ga lwaa fan ki ka soo val ah ne ya. A ga kaara goŋ tǝ ɓiiri.
45 Gaɓ mai daŋ, a ga ge tǝtǝl ɓiiri, a ga yea tǝ ɓii ŋhaa sai ka we vǝr ɓe, mor we zyii ka laa zah Dǝɓlii Masǝŋ ɓii tǝkine syee mor ɓǝ lai ah ra daŋ mai mo nyi ɓo nyi we ya. 46 Gaɓ ah a ga yea na fan ma cuu kiita Masǝŋ tǝ ɓii ne morsǝ̃ǝ ɓii ga lii ga lii. 47 Koo Dǝɓlii mo ẽe we ne fahlii camcam daŋ laŋ, we ka ga zyii joŋ mor ah ne 'nyah suu ne laa pǝ'nyah ne zahzyil daŋ ya. 48 So we ga joŋ mor za syiŋ ɓii mai Dǝɓlii moo ga peera gin ka ɗaŋ we, koŋ farel ne koŋ bii daŋ a ga cuu swãa ɓiiri, we ka ga yea ne fan wo suu tǝkine fan manyeeki ah ra ya ta. Za syiŋ ɓii ga cuura bone nyi we pǝlli, ŋhaa sai ka we vǝr ɓe. 49 Dǝɓlii ga pee za ki daga zahtǝmgboo sǝr ge ka ruu sal ne we, za mai we tǝ zah ɓǝǝ taa ya, a ga cwǝǝra gin tǝ ɓii tǝgbana vakke. 50 Zan ah ra pǝgaɓ no cam, ka ga kwora syak koo tǝ za tam ne wee nyee laŋ ya. 51 A ga ŋgomra dǝǝ ɓii re, ne fakpãhpǝǝ ɓii daŋ, so we ga wuk koŋne, ka ga soɓra sor ne bii lee kpuu vin, ne dǝǝ ɓii wala gwii ɓii ya, we ga wukki. 52 A ga ruura sal ne yaŋ maluu daŋ mo pǝ sǝr mai Dǝɓlii Masǝŋ ɓii mo nyi ɓo nyi we. Yaŋ ɓii maswah mawah ah ra, ne ɓaale ɓii ra mai we gbǝ yǝk ɓǝ ah ra ɓo daŋ, a ga hah ga sǝŋ.
53 Ne cok za syiŋ ɓii mo ge ryaŋra yaŋ ɓii maluu ra ne sal ɓe, koŋ ga joŋ ki ne we, so we ga ryak wee ɓii mai Dǝɓlii Masǝŋ ɓii mo nyi ɓo nyi we. 54-55 Koo dǝɓ mai mo byaŋ ɓo morsǝ̃ǝ za mayǝk ah laŋ, ne cok za syiŋ ɓii mo ge ryaŋ yaŋ ah ɓe, zahzyil ga nǝǝ ko, a ga gbǝ wel ah vaŋno re, mor farel ki kǝka. Ka ga re laŋ ne naa pah ahe, wala mawin ah mai moo 'yah pǝlli, wala ne tǝcoŋ wee ah manyeeki ah ra mai mo coŋ ɓo ya. 56-57 Koo mawin mai mo byaŋ ɓo morsǝ̃ǝ za mayǝk ahe, koo mo pǝyǝk ɗǝne, mo syee ne ɓal taa ya laŋ, a ga joŋ nai ta. Ne cok za syiŋ ɓii mo ge ryaŋra yaŋ ah ɓe, zahzyil nǝǝ ko tǝ ɓǝ farelle. Mo byaŋ we pǝ̃ǝ ge ɓo sǝŋ zǝ̃ǝ laŋ, a ga lal re wel ahe, ka ga re laŋ ne wor ah mai moo 'yah pǝlli ya, wala ne wee ah maki ah ra ya.
58 We zyii ka syee mor ɓǝ lai Dǝɓlii mai mo ŋwǝǝ ɓo pǝ ɗerewol mai daŋ ne goŋga ya, we yii yǝk tǝɗii Dǝɓlii Masǝŋ ɓii mai mo nǝn ɗuu gal ah ya ɓe, 59 Dǝɓlii ga pee bone magaɓ ah ne syem maɓe' mai mo ka gak laɓ ya ge tǝ ɓiiri. 60 A ga pee syem maɓea ah mai we ɗuu gal ah sǝr Egiɓ ge tǝ ɓii faɗa, a ga mgbãa we kpǝtak. 61 So Dǝɓlii ga pee zahban syem maɓe' camcam, ne fabaa mai tǝɗii ah mo ŋwǝǝ ɓo ka pǝ ɗerewol ɓǝ lai Masǝŋ ne ɓǝ cuu ah nyee ya ge tǝ ɓiiri, so we ga vǝr tǝɗe'. 62 Dǝɓlii Masǝŋ ɓii 'yah we yea pǝpãa tǝgbana ŋwǝǝmǝŋgai sǝŋ. Amma we ka tǝ zyii laa zah ah ya ɓe, we ka ga coŋ sǝŋ pǝlli ya. 63 Tǝgbana Dǝɓlii mo laa pǝ'nyah ka joŋ ɓǝ sãh wo ɓiiri, ka joŋ we ka we ɓoo pǝpãare, so a ga laa pǝ'nyah ne muŋ we, ka vǝr we tǝɗe' ta. A ga lwǝǝ we gin pǝ sǝr mai we tǝ ga gŋ ka renne.
64 Dǝɓlii ga myah we kǝsyil za sǝr daŋ, daga zahtǝmgboo sǝr mai ŋhaa ga dai ma kǝki ahe. We ga joŋ mor masǝŋ ki ra mai mo zyeɓra ne kpuu, ne tǝsalle, masǝŋ mai awe ne pa ɓii lii ra we juupel wol ah taa ya. 65 We ka ga lwaa kaa jam kǝsyil zan ah kpee ya. Dǝɓlii ga joŋ zahzyil nǝǝ we, nahnǝn ɓii ga ɗuu galle, byak fan ɓii a ga vǝrri. 66 Cẽecẽe we ga yea zah wul gwari, com ne suŋ daŋ we ga ɗuu galle, we ga kaa ne ɗuu gal wulli. 67 Fan mai we ga kwo daŋ, zahzyil ɓii ga ɗuu gal ahe. Ne zah'nan ɓe, we ga 'yah lilli, ne lil ɓe laŋ, we ga 'yah zah'nanne. 68 Dǝɓlii ga jin pee we ne dah pii soo ga sǝr Egiɓ pǝ cok mai we yea tǝ joŋ byak gŋ, koo mo faako ɓo, we ka pii soo ga gŋ faɗa yao laŋ ko. So we ga kyeɓ ka lea suu ɓii ga jol za syiŋ ɓii na byakke, amma koo dǝɓ vaŋno laŋ ka ga zyii lee we ya.
© Bible Moundang © Alliance Biblique du Tchad, 1996.
