Yaŋ Jerusalem ɓeɓ ɓo pǝlli
1 Vãm kaŋnyeeri mai mo yea tǝ sãh taataa kŋ ii ɓe,
Tǝsal mai mo vuura yaŋ Masǝŋ ne myah ɓo tǝgǝǝ yaŋ haihai.
2 Wee tǝbanna Sion mai ru yea tǝ kwanra pǝsyem na vãm kaŋnyeeri kŋ,
Zǝzǝ̃ǝ za a joŋ ra tǝgbana cii mai mo vuura ɓo ne vuuri.
3 Koo goobam laŋ a wol wee ah ne wonni,
Amma mǝ za ɓe ka 'yahra wee ɓǝǝ ya na majuulii.
4 A soɓra wee nyee ɓǝǝ ma zahwon wuk koŋ farel ne koŋ bii.
Wee nyee a syeara farelle,
Amma koo dǝɓ vaŋno ka bǝǝ kan gai ra jol a.
5 Za mai mo yea tǝ renra farel 'nyah leara tǝ fahlii wuk koŋ gŋ,
Za mai mo ciira ɓo ne cok kal 'nyahre,
Zǝzǝ̃ǝ a kyãhra fyak farel tǝ halle.
6 Ɓǝɓe' mai za ɓe mo joŋni, a pǝ'man kal faɓe' za yaŋ Sodoma mai Masǝŋ mo ge vǝr ra na daa nǝn ɓe.
7 Wee goŋ ɓuu yeara bai 'nahmme,
Suu ɓǝǝ pǝsãhe, ara pǝswah ta,
A laara syim suu ɓǝǝ pǝ'nyahre.
8 Zǝzǝ̃ǝ a kwanra pǝfuu na forum fal ciiri,
Wukra ɓo tǝ fahlii,
Dǝɓ ka gin tan ra ya.
Wak suu ɓǝǝ baŋ ge ɓo tǝki pǝyak na kpuu,
Soɓ woiŋ ɓo to o.
9 Pǝram za mai mo wukra zah sal ne kafahe gin tǝ za mai koŋ mo cuu syak nyi ra liilii mo so wukra ne ko.
10 Ɓeɓ mai mo ge tǝ za ɓe ge tǝ ɓǝǝ ne gaɓ pǝlli,
Mah wee a kǝǝra wee ka syak ɓǝǝ renne.
11 Dǝɓlii ɓaŋ kpãh pǝ'manne,
Ɓoo wii tǝ Sion ne sye vǝr tǝɗe'.
12 Koo zune wo sǝr daŋ, koo za goŋe,
Lǝŋra sõone za sal za sǝr ki a gak gin danra zahfah yaŋ Jerusalem ka ɗaŋ yaŋ ah comki ta,
Lǝŋra ya.
13 Amma ɓeɓ ah ge,
Mor ɓǝ faɓe' profetoen tǝkine ɓǝ za joŋzahsyiŋ mai mo gŋ mo ikra za mai moo ɗuura Masǝŋ pǝ wul tǝkol 'wel.
14 Zaluu yaŋ ah a kyãhra tǝgǝǝ yaŋ juu cok na rǝ̃ǝ,
Suu ɓǝǝ roo syim ɓo byakbyak,
Iira ɓo ne ko,
Mor ah koo dǝɓ vaŋno ka zyii juu jol ga wo ɓǝǝr a.
15 Mo ge daira kah za ɓe, za faa nyi ra:
We zol kalle,
We ne 'nahm pel Masǝŋ!
We zol kalle,
We juu jol ge wo dǝɓ vaŋno ka.
A kyãhra gur zah sǝr zan haihai,
Dǝɓ ma nyiŋ ra tǝ sǝr ah kǝka.
16 Dǝɓlii ye myah ra ɓo ne suu ahe,
Ka ne 'yah kwan ra ya,
Eẽ ɓǝ za joŋzahsyiŋ ɓuu ne zaluu ɓuu ya.
17 Nahnǝn ɓuu ẽe cok ŋhaa gaɓ ka so gak kwan cok ya jol mai ru kan nahnǝn ɓo ɗah maki ru lwaa gbah jol no ne,
Ru so lwaa ya.
Ru kaa ne byak sǝr maki ah tǝkol 'wel,
Sǝr ah gak ǝ̃ǝ ru laŋ ya.
18 Pa syiŋ ɓuu a pii ru pii,
Ru ka ɓaŋ ɓal ɓuu nai ka ga kyãh tǝgǝǝ yaŋ ya.
Zah'nan ɓuu ge gwari ɓe,
Zah'nan ɓuu vǝr ɓe.
19 Za mai mo tǝ nĩira ru ara pǝgwah fǝlyao kal matǝr moo ur gin sǝŋ gin in fan ɓe.
Ru tǝwaa ɓe, a nĩira ru gŋ,
So ru kǝsyicok pǝ cok matǝ gbai ah laŋ, a gin ɓaŋra ru gŋ ne morgahe, a joŋra ki ne ru.
20 Gbǝra goŋ mai Dǝɓlii ye mo nǝǝ ɓo ɓe,
Dǝɓ mai ru soɓ suu ɓuu ɓo wol ahe,
Mai ru yea tǝ faa pa syiŋ ɓuu mo ge ɓe,
A gak ǝ̃ǝ ru pel ahe, gbǝra ko ɓe.
21 Za Edom ne za Us, we syesyak o,
We laa pǝ'nyah tǝgbana zahzyil ɓii mo 'yahe.
Amma ɓeɓ ma ɓii no tǝ gin ta.
Bone ga joŋ we tǝgbana dǝɓ moo zwan yim tǝǝ ne ko,
We ga syee ne zahmorkol swãa re we.
22 Sion re reba faɓe' ah ɓo,
Dǝɓlii ka ga soɓ na yea pǝ byak nai ga lii yao.
Amma amo Edom,
Dǝɓlii ga cuu bone nyi mo mor ɓǝ faɓe' ɓo,
A ga joo yeɓ ɓe' ɓo ra daŋ gin lal taŋraŋ.
© Bible Moundang © Alliance Biblique du Tchad, 1996.
