Ezekiel saŋ rĩi ahe
1 Dǝɓlii faa nyi me: We dǝfuu, mo ɓaŋ kafahe, ka mo gbǝ na nyahswãhe, mo saŋ tǝtǝl ɓo ne ko ne pyaŋ ɓo. So mo ɓaŋ fan lii fanne, ka mo woŋ rĩi ɓo ne ko ne pyaŋ ɓo zahlǝŋ sai. 2 Ka mo ɓaŋ vaŋno ma pǝzyil sai ahe, mo syak ne wii kǝsyil yaŋ, ne cok zah'nan ryaŋ yaŋ ah ne sal mo vǝr ɓe ko. Ka mo so ɓaŋ patǝ gwa ah ma pǝzyil sai ahe, ka mo ŋgom biŋbiŋ rǝk ryaŋ yaŋ ah daŋ ne ko. Ka tǝcoŋ patǝ sai ah mo myah ge pǝzyil zyakke, so me ga nǝǝ kafahe ɗuu mor ah ne ko. 3 Amma mo nǝǝ rĩi biŋ gin pǝzyil patǝ sai ahe, ka mo baŋ ge wo mbǝro ɓo. 4 So ka mo nǝǝ maki ah ra gin gŋ faɗa, mo rǝk ge tǝ wii, ka wii mo sye. So wii ah a ga pǝ̃ǝ joŋ ki ne za Israel daŋ.
5 Masǝŋ Dǝɓlii faa: We ẽe, me kan yaŋ Jerusalem ɓo kǝsyil sǝr daŋ jaŋjaŋ, me rǝk sǝr manyeeki ah ryaŋ ɓoo kǝsyil ne ko. 6 Amma za yaŋ Jerusalem ŋwoora kyaŋ ne ɓǝ lai ɓe, ne ɓǝ faa ɓe ra, ne mai moo joŋra fan maɓe' ah kal zahban manyeeki ah ra. Jerusalem soɓ ɓǝ faa ɓe ra ɓoo, ka zyii syee mor ɓǝ lai ɓe ya. 7 Mor ahe, Jerusalem, mo laa ɓǝ mai ame Dǝɓlii Masǝŋ me tǝ faani. We ka tǝ zyii syee mor ɓǝ lai ɓe ra, ne ɓǝ faa ɓe ra ya to ya, awe ŋwookyaŋ ɓo ne me kal za sǝr mai mo kaara ryaŋ we ɓo, awe syee mor zah fan joŋ za ki. 8 Mor ahe, ame Dǝɓlii Masǝŋ, me tǝ faa nyi we, ame ye pa syiŋ ɓii o. Me ga ŋgoŋ kiita tǝ ɓiiri, ka za sǝr daŋ mo kwora. 9 Mor fan maɓe' ah mai wee joŋ daŋ me syiŋ ɓǝ ah ɓo syiŋ, me ga joŋ fan mai me joŋ taa ya wo ɓii tǝ ɓǝ ahe, koo ga pel laŋ me ka joŋ fan ah faɗa yao. 10 Za wee mai mo yaŋ Jerusalem daŋ a ga ryakra nǝǝ wee ɓǝǝra, wee laŋ a ga ryakra nǝǝ za ɓǝǝra. Me ga ŋgoŋ kiita tǝ ɓiiri, za mai mo coŋ ɓo sǝŋ ne cee daŋ, me ga myah ra ga laa sǝr nai daŋ.
11 Dǝɓlii Masǝŋ faa: 'Manna, ame ye Masǝŋ ma ne cee, mor we ɓeɓ yaŋ ɓe ne masǝŋ ki ɓii ra, ne fan joŋ maɓea ah mai we joŋni, me ga vǝr we, me ka kwo syak tǝ ɓii ya. 12 Vaŋno ma pǝzyil sai za ɓii a ga wukra ne syem maɓe' ah tǝkine koŋ ɓǝr yaŋ Jerusalem, vaŋno ma pǝzyil sai maki ah a ga ikra ra pǝ wul fahfal yaŋ ah lalle, so me ga myah tǝcoŋ vaŋno ma pǝzyil sai maki ah ga pǝzyil zyakke, so me ga nǝǝ kafahe ɗuu mor ah ne ko.
13 We ga laa yǝk kpãh ɓe me ɓaŋ ɓo, me ga faŋ val tǝ ɓii ŋhaa a 'nyah suu ɓe ɗǝ. Ne cok fan mai daŋ mo joŋ ɓe, we ga tǝ, ame ye faa ɓǝ ɓo nyi we, mor me ka 'yah vǝrvǝr a. 14 Koo zune kǝsyil za mai mo kaara ryaŋ yaŋ ah ɓo mo ge tǝ pǝ̃ǝra kah ah ɓe, a ga cik tǝtǝl ne ɓǝ ah a kaa gǝriŋ.
15 Ne cok me ɓaŋ kpãh tǝ ɓii pǝ'man me ŋgoŋ kiita tǝ ɓii ne ɓe, za mai mo kaara ryaŋ we ɓo daŋ gal ga re ra, a ga syẽara we, a ga syakra we syakke. 16 Me ga vǝr farel ɓii ra daŋ, we ga wukki, we ga laa syen koŋ tǝgbana guu mai mo 'nǝǝ ɓo ka ik we pǝ wulli. 17 Me ga pee koŋ ne fafyãh cok gin ik wee ɓii pǝ wulli. Me ga pee syem maɓe' ahe, tǝkine sal gin ik we, so we ga ɗuu syim kǝsyil ki ta. Ame Dǝɓlii me faa naiko.
© Bible Moundang © Alliance Biblique du Tchad, 1996.
