Cii madah ahe
1 Dǝɓlii faa nyi me, me ge lee ciiri. So faa nyi me: Mo ɗii za ki kǝsyil zaluu ma pel zana, ne za ki kǝsyil zaluu za joŋzahsyiŋrĩ, 2 ka mo ge ne ra pǝ cok tǝforoŋ Hinnom mai mo gwari ne kah zahfah mai moo vuura cii gŋ, ka mo ge faa ɓǝ mai Dǝɓlii mo faa ɓo nyi mo gŋ ŋhaako. 3 Dǝɓlii faa nyi me ka me faa nyi we za goŋ Yuda ne za yaŋ Jerusalem: We syii sok we laa ɓǝ mai ame Dǝɓlii ma ne swah daŋ Masǝŋ Israel me ne ka faani. Me ga pee ɓeɓ ge tǝ cok maiko, koo zune mo laa ɓǝ ah ɓe daŋ a ga njǝk sok nyi. 4 Me ga joŋ nai mor za soɓra me ɓoo, so ɓeɓra cok mai ne joŋ syiŋ wo masǝŋ ki, mai ara ne pa ɓǝǝ lii ra ne za goŋ sǝr Yuda daŋ mo tǝra ɓǝ ah taa ya. Ɗuura syim za ma bai ɓǝɓe' pǝ cok mai pǝlli, 5 vuura cok joŋ syiŋ wo Ba'al, ka cwah wee ɓǝǝ tǝ wii gŋ joŋ syiŋ ne ko. Ame faa nyi ra ka mo joŋra syiŋ ne wee ɓǝǝ ɗǝ ya, koo pǝ ɓǝ foo ah laŋ me foo taa ya. 6 So ame Dǝɓlii me faa, zah'nan ah no ginni, ne cok ah ka ga ɗiira cok mai ne Tofet, wala cok tǝforoŋ Hinnom ya. Amma a ga ɗiira ne cok Ik Zana. 7 Me ga joŋ ɓǝ foo za sǝr Yuda ne za yaŋ Jerusalem pǝ cok mai na ɓǝ kolle. Me ga soɓ za syiŋ ɓǝǝ kaara kacella tǝ ɓǝǝ a ikra ra zah salle. Me ga nyi wul ɓǝǝ nyi juu ne fafyãh cok re. 8 Me ga pee ɓeɓ magaɓ ah ge ka ɓeɓ yaŋ maiko, koo zune mo ge pǝ̃ǝ gŋ ɓe daŋ, a ga cik tǝtǝl a kaa gǝriŋ tǝ ɓǝ fan mai mo joŋ yaŋ ah ɓo. 9 Me ga joŋ za mai mo kaara ɓo yaŋ ah a ga rera nǝǝ wee ka syak ɓǝǝra. Ne cok za syiŋ ɓǝǝ mo ge ryaŋra yaŋ nyee mo tǝ kyeɓra ka ik ra ga lal ɓe, ne zah'nan gaɓ ah a ga rera nǝǝ za jǝk ɓǝǝra.
10 So Dǝɓlii faa nyi me ka me dah cii pel za mai mo gera ɓo ne me, 11 ka me so faa nyi ra: Dǝɓlii ma ne swah daŋ faa: Me ga dah za mai ne yaŋ mai tǝgbana mo dah cii ta, ka gak dahɓ ga wo ki faɗa yao, za ga ciira wul ɓǝǝ Tofet, mor cok maki ah ka cii wul ɓǝǝ gŋ kǝkao. 12 Me ga joŋ yaŋ mai ne za mai mo kaara ɓo gŋ daŋ naiko, me ga joŋ yaŋ ah na Tofet. Ame Dǝɓlii me faa naiko. 13 Yaŋ ma yaŋ Jerusalem, ne yaŋ za goŋ Yuda ne yaŋ camcam mai moo tǝǝra ɓǝrdi gŋ wo ŋwǝǝmǝŋgai sǝŋ, ne yaŋ mai moo sǝǝra syiŋ wo masǝŋ ki ra gŋ daŋ a ga yea ne 'nahm na Tofet.
14 Ame pii soo gin Tofet mai Dǝɓlii mo pee me ge faa ɓǝ faa ah gŋ. Ame ge uu zah yaŋ Masǝŋ me faa nyi za daŋ: 15 Dǝɓlii ma ne swah daŋ Masǝŋ Israel faa: Me ga pee bone mai me faa ɓǝ ah kŋ gin tǝ yaŋ nyee ne yaŋ ma kah ah ra daŋ, mor tǝtǝl ɓii pǝyakke, we ka tǝ ga zyii laa ɓǝ mai me faa ɓo ya.
© Bible Moundang © Alliance Biblique du Tchad, 1996.
