Yǝk fatanne
1 Cok mai moo ciira vãm gŋ a no, cok mai moo swãhra vãm kaŋnyeeri gŋ a no ta. 2 Dǝfuu a ciira vãm gin mor sǝrri, a joŋra vãm syẽ hǝǝ pǝzyil tǝsal pǝ̃ǝ gin lalle. 3 Dǝfuu a kyeɓra mor ɓǝ cokfuu ka tanne. A kyeɓra tǝsal mai mo mor sǝr pǝɗǝk pǝ cok mafuu tǝ piɓpiɓɓa. 4 A ciira lak kal ga sǝŋ pǝɗǝk pǝ cok mai dǝfuu mo ka gŋ ya, pǝ cok mai ɓal dǝfuu mo ka syee gŋ ya. Dǝfuu a ciira lak mor vãmme, a yeara ma gŋ syak ɓǝǝ ŋhaako, a ɓoora sal ga wo suu joŋ yeɓ ne ko.
5 Farel dǝfuu a ciŋ gin tǝ sǝrri, amma mor sǝr ah sǝŋ dahra ɓo dahe. 6 Tǝsal mai mo gŋ, tǝsal masãh ma ɗii ne safir a baa ma gŋ gǝɓ, vãm kaŋnyeeri laŋ a yea ma gŋ ta. 7 Mavakmǝr tǝ fahlii ga pǝ cok mai moo ciira vãm gŋ ya, matǝkwak laŋ tǝ fahlii ah ya ta. 8 Koo ɓol ne fafyãh cok manyeeki ah laŋ ka syeera tǝ fahlii ah ya.
9 Dǝfuu a ciira tǝsalle, a ciira waa ne mor fil ɓǝǝ daŋ ga lalle. 10 A dahra pǝɗakka bii ɓal gŋ pǝ̃ǝ gin lalle, so a kwanra tǝsal masãh ah ra mo gŋ. 11 A ciira mor bii mai moo ɗuu pǝ zǝǝre, a nǝǝra fan mai mo muŋ ɓo gŋ ŋhaa pǝ̃ǝ gin lal ne ko. 12 Amma cok mai fatan mo gŋ sye a kẽne? Wala cok mai ka dǝɓ mo lwaa yella gŋ a kẽne? 13 Dǝɓ ka lwaa fatan kǝsyil dǝfuu ya, dǝɓ ma tan yǝk ah laŋ kǝka ta. 14 Mabii maluu ne manyee ah daŋ a faara: Fatan ka ɓǝr ɓuur a. 15 Dǝɓ ka gak lee fatan ne vãm solai wala ne vãm kaŋnyeeri ya. 16 Vãm kaŋnyeeri masãh ah tǝkine tǝsal masãh ah ra kii nǝn lee ah ya. 17 Yǝk ah kal vãm kaŋnyeeri ɓe, kal cii ma vãm kaŋnyeeri wala fakwancee masãh ah ɓe. 18 Fatan kal tǝsal masãh ah ma ɗii ne koral wala tǝsal ma ɗii ne kristal ne yǝk ɓe. 19 Tǝsal masãh ah mai moo ɗii ne topas tǝkine vãm kaŋnyeeri masãh ahe, dǝɓ ka gak woo ra lii zahki ne fatan a. 20 Cok mai fatan mo gŋ sye a kẽne? Cok mai ka dǝɓ mo lwaa yella gŋ a kẽne? 21 Dǝfuu mai mo ne cee tǝra cok mai fatan mo gŋ ya. Koo juu ma zoo sǝŋ laŋ tǝra cok ah ya. 22 Wul tǝkine cok mai moo muŋ dǝɓ faara: Aru laa ɓǝ ah ne sok ɓuu laa to.
23 Masǝŋ ye tǝ fahlii ah ɓo syak ahe, ako ye tǝ cok mai fatan mo no gŋ to. 24 Mor Masǝŋ a kwan cok mai zahtǝmgboo sǝr mo ge i zah ɓo gŋ, a kwan fan mai mo no mor masyiibam daŋ ta. 25 Ne cok Masǝŋ mo nyi swah nyi zyakke, so lii yǝk bii laŋ ta, 26 ne cok Masǝŋ mo faa ka bam mo tǝ, so ɗee laŋ fahlii ka sãh bam mo syee gŋ ta, 27 so kwo fatanne, lii yǝk ahe, ako ye kanne, so cuu mor ah ge lalle. 28 Masǝŋ faa nyi dǝfuu: We ɗuu Dǝɓlii ka we tǝ fanne, we soɓ joŋ ɓǝɓe' ka we yea pǝ yella.
© Bible Moundang © Alliance Biblique du Tchad, 1996.
