Za Israel zyeɓra suu ka ga sǝr Kanaan
1 Fahfal wul Mosus dǝɓ yeɓ Masǝŋ, Dǝɓlii faa nyi Joswa we Nun dǝɓ yeɓ Mosus: 2 Dǝɓ yeɓ ɓe Mosus wǝ ɓe. Zǝzǝ̃ǝko amo ne zai daŋ mo ur mo yee el Yordan mor ka ga sǝr mai me nyi ɓo nyi za Israel. 3 Cok mai ɓal ɓii moo ga dǝǝ daŋ me nyi we tǝgbana me faa nyi Mosus. 4 Tǝŋ daga kǝsyicok nǝfah morkǝsǝŋ, tǝkine waa Liban nǝ fahsǝŋ, ŋhaa ge dai kah el malii mai moo ɗii ne Efrat nǝkǝmorcomzah'nanne, ne sǝr Hetien daŋ ŋhaa ge dai mabii Mediterrania nǝfah kǝmorcomlilli, zahsyee sǝr ɓii yo. 5 Joswa, ne zah'nan cee ɓo daŋ dǝɓ ma gak uu pel ɓo ka yea ya. Me ga yea ne mo tǝgbana me yea ne Mosus. Me ka soɓ mo ɓoo ya, me ka soɓ mo syak ɓo ya. 6 Mo swaa suu ɓo, mo gbǝ zahzyilli, mor amo ye tǝ ga ne za rai pǝ sǝr mai me haa zah nyi pa ɓǝǝ ka nyi nyi ra. 7 Amma sai mo swaa suu ɓo, mo gbǝ zahzyilli, mo joŋ yella ka mo joŋ tǝgbana ɓǝ lai mai daŋ dǝɓ yeɓ ɓe Mosus mo ree nyi mo. Mo cak pǝ ɓǝ ah ge nǝjokǝsãh koo nǝjokǝlǝɓai ka, mor ka mo yea ne pejii pǝ cok daŋ moo ga gŋ. 8 Ɗerewol ɓǝ lai mo woŋ ki ne tǝkpuuzah ɓo ka, mo foo ɓǝ ah com ne suŋ daŋ. Mo joŋ yella, ka mo joŋ tǝgbana ɓǝ mai mo ŋwǝǝ ɓo gŋ daŋ, mor ka mo laa pǝ'nyah tǝ fahlii ɓo, ka mo yea ne pejii. 9 Ame ye ka faa nyi mo, mo swaa suu ɓo mo gbǝ zahzyil sye ya ne? Mo ɗuu gal ka, suu mo coo mo ka ta, mor ame Dǝɓlii Masǝŋ ɓo me no ne mo pǝ cok daŋ moo ga gŋ.
Joswa cuu fahlii nyi zana
10 Joswa faa nyi zaluu ma pel zana: 11 We kyãh kǝsyil cok ɗǝr we faa nyi za sye: We zyeɓ farel ɓiiri, mor tǝgǝǝ zah'nan sai we ga yee el Yordan mai mor ka ga dan pǝ sǝr mai Dǝɓlii Masǝŋ ɓii mo nyi we ka renne.
12 So Joswa faa nyi Rubenien ne Gadien tǝkine raita ban Manasse: 13 We foo ɓǝ mai Mosus dǝɓ yeɓ Masǝŋ mo ree nyi we: Dǝɓlii Masǝŋ ɓii nyi sǝr mai nyi we ka we kaa gŋ. 14 Ŋwǝǝ ɓiiri, wee ɓiiri, tǝkine ŋgaɓ fan ɓii daŋ mo haira pǝ sǝr mai Mosus mo nyi we kah el Yordan nǝzakǝino. Amma awe za ma nen gak ruu sal daŋ we kal pel wee pa ɓii yee elle, ka we gbah jol ɓǝǝra, 15 sai ka Dǝɓlii nyi cok kal nyi wee pa ɓii tǝgbana mo nyi we ɓe ta. Ka mo lwaara sǝr ma ɓǝǝ mai Dǝɓlii Masǝŋ ɓii mo nyi nyi ra ka ren ɓe, ka fahfal ah we pii soo ge pǝ sǝr ma ɓii mai Mosus dǝɓ yeɓ Dǝɓlii mo nyi we kah el Yordan nǝzakǝŋhaa nǝfah morcomzah'nan ba.
16 So zyiira zah Joswa faara: Ɓǝ mai mo faa nyi ru daŋ ru ga joŋ, pǝ cok mai moo ga pee ru ga gŋ daŋ ru ganne. 17 Tǝgbana ru laa zah Mosus ne ɓǝ daŋ, ru ga laa zah ɓo nai ta. Amma sai Dǝɓlii Masǝŋ ɓo mo yea ne mo, na mo yea ne Mosus. 18 Koo zune moo ga ŋwookyaŋ ne ɓǝ faa ɓo, mo zyii laa ɓǝ faa ɓo mai mo ga faa nyi ko ya ɓe, a ga lwaa wulli. Amma sai mo swaa suu ɓo, mo gbǝ zahzyilli.
© Bible Moundang © Alliance Biblique du Tchad, 1996.
