YUDAS 1 - Bible Moundang (MUA)

Haozah woli

1 Ame Yudas dǝɓ yeɓ Yesu Kristu, naa mah Yakuɓ, me ŋwǝǝ leetǝr mai wo za mai Masǝŋ mo ɗii ra ɓo, Masǝŋ Pam tǝ 'yah ra, za mai Yesu Kristu mo tǝ byak ra.

2 Masǝŋ mo joŋ gboŋgboŋ wo ɓii ne nyi jam tǝkine 'yah nyi we pǝlli.

Za ma cuura ɓǝ berre

(2 Pe 2:1-17)

3 Za 'yah ɓe, me tǝ kyeɓ kǝnah ne swahe, ka me ŋwǝǝ ɓǝ wo ɓii tǝ ɓǝ ǝ̃ǝ man na ne tǝki vaŋno. Amma so me kwo ɓǝ ah ɓo wo ɓe na doole, ka me ŋwǝǝ leetǝr mai wo ɓii mor ka lai we ne ka we ruu sal ne mor iŋ mai Masǝŋ mo nyi ɓo nyi zan ah daŋ ɓal vaŋno sǝ. 4 Mor za maɓea manyeeki ah danra ɓo kǝsyil man ne yella, a ferra ɓǝ gboŋgboŋ Masǝŋ man mor ka joŋ fan bai swãa suu ɓǝǝ ne ko, zyii nyiŋra Yesu Kristu Goŋ man matǝ vaŋno ne Dǝɓlii man a. Ɗerewol cuu ɓǝ kiita mai mo ŋgoŋ kan ɓo tǝtǝl ɓǝǝ daga ɓaaɓe.

5 Awe tǝ ɓǝ mai daŋ ɓo belbelle, amma ne daŋ laŋ me 'yah ka ur ɓǝ foo ah wo ɓii faɗa. Ne cok Dǝɓlii mo ǝ̃ǝ za Israel gin sǝr Egiɓ, amma so ik za mai mo zyii nyiŋra ya. 6 We foo ɓǝ angeloi mai mo uura pǝ cok ul ɓǝǝ mai mo nyira swah ah ɓo nyi ra ya, amma so soɓra cok kal ɓǝǝra. Masǝŋ byak ra ɓo pǝ cokfuu matǝ ɓoroo, gaa ra ɓo gŋ ne celeelu mor zah'nan malii mai moo ga ŋgoŋ kiita tǝ ɓǝǝ ne ko. 7 We foo ɓǝ yaŋ Sodoma ne Gomorra tǝkine yaŋ ma kah ɓǝǝ daŋ. Za yaŋ ah joŋra tǝgbana angeloi maraiko, soɓra suu ɓǝǝ mor joŋ ɓǝǝre, a kyeɓra ka tai ki ne fahlii mai mo ka mor ah ya, tǝ laara bone pǝ wii ma ga lii, fan ah joŋ ɓo mor ka lai za daŋ.

8 Mor za mai laŋ a joŋra fan nai ta, a syeera mor ɓǝ lom ɓǝǝ mai moo kǝǝ ra joŋ faɓe' wo suu ɓǝǝra, a syẽara swah Masǝŋ, a tǝǝra fan ma ne cee mayǝk ah mai ara mo coksǝŋ. 9 Ne cok mai Mikal dǝɓlii zapee ma coksǝŋ mo syesyel ne Satan tǝ ɓǝ wul Mosus, ne cok mo tǝ faara ɓǝ tǝl ah azu ye ga ɓaŋ wul ah ne, Mikal faa ɓǝɓe' tǝ Satan tǝǝ ko ne ya, sai faa nyi ko: Dǝɓlii ye ga ŋgoŋ kiita ɓo ! 10 Amma za mai a tǝǝra fan mai mo tǝra mor ah ya, sai fan mai mo tǝra ɓo ne kpak ɓǝǝ ma na nǝǝ cok to, fan ah a ga muŋ ra. 11 Ɓǝ gaɓ tǝ ɓǝǝra! Mor ɓaŋra fahlii Kain ɓo, danra ɓo pǝ ɓǝ maɓe' ah mor cwaa lak tǝgbana Bileam, muŋra ɓo ne ŋwookyaŋ tǝgbana Kora. 12 Ne cok mo gera tǝ ren farel 'yah ɓii ne we, ara no na fan ma zyak ɓiiri, mor a joŋra fan joŋ bai swãa ɓǝǝ pǝ cok joŋ fĩi ne we, a foora ɓǝ suu ɓǝǝ to, ara tǝgbana swãh bam mai zyak moo ɓaŋ kal ne mo ka tan bam ya. Ara tǝgbana kpuu mai koo cok lee ah mo ge laŋ, mo ka gak lee ya, tǝgbana kpuu mai mo wǝ ɓo ne sǝ̃ǝ ah daŋ. 13 Ara na wea bii mai moo wea ne swah moo wii tǝfǝǝ gin lalle, yeɓ 'nahm ɓǝǝ laŋ a pǝ̃ǝ gin lal nai ta. Ara tǝgbana ŋwǝǝmǝŋgai mai mo zyakra fahlii ɓo, Masǝŋ zyeɓ cokfuu matǝ kurum kurum ah kan ɓo mor ɓǝǝra, ka mo kaara gŋ ŋhaa ga lii.

14 Enok mai mo daga morsǝ̃ǝ Adam, ako ye mo patǝ rǝŋ ahe, faa ɓǝ fan mai mo tǝ ga joŋ tǝ ɓǝǝ daga ɓaaɓe, faa: We ẽe ɗǝ, Dǝɓlii ga ge ne angeloi ah ujenere pǝpãare, 15 mor ka ŋgoŋ kiita tǝ za daŋ, ka faŋ val tǝ za maɓea ah mor yeɓ ɓe' mai mo joŋra ne ŋwookyaŋ ne Masǝŋ tǝkine ɓǝ faa maɓea ah mai za faɓe' rai mo faara tǝl ahe. 16 Za mai a mgbǝrra ɓǝ cẽecẽe, ka laara ɓǝ za ki pǝ'nyahr a, a syeera mor fan cwaa suu ɓǝǝra, a faara ɓǝ pǝ'man yii suu ɓǝǝ ne ko, a faara ɓǝ pǝ'nyah wo za ki ka lwaa fan ne jol ɓǝǝra.

Lai tǝkine fan cuuni

17 Amma awe, za 'yah ɓe, we foo ɓǝ mai zapee Dǝɓlii man Yesu Kristu mo faara nyi we kǝpelle. 18 Mor faara nyi we sye: Ne zah'nan ma fahfal mo tǝ yah ginni, za ki ga pǝ̃ǝra, a ga syakra we, a ga syeera mor fan cwaa suu ɓǝǝ maɓe' to. 19 Zan ah ara ye za ma woŋra zana, fan cwaa suu ye kaa swah ɓo tǝ ɓǝǝra, Tǝ'yak Masǝŋ ka wo ɓǝǝr a. 20 Amma awe, za 'yah ɓe, we giŋ ge pel pǝ iŋ ɓii matǝ goŋga. We juupel ne swah Tǝ'yak Matǝdaŋdaŋ. 21 We gbǝ suu ɓii pǝ 'yah Masǝŋ. We byak Dǝɓlii man Yesu Kristu moo ga joŋ gboŋgboŋ wo ɓii ne nyi cee ma ga lii nyi we.

22 We swaa za mai ara mo ne syel pǝ zahzyilli, 23 we ǝ̃ǝ za ki ne nǝǝ ra gin tǝ wii. So we kwo syak tǝ za ki ne kwan syak mai mo suuki ɓo ne ɗuu gal gŋ, amma we syiŋ mbǝro mai mo ii ɓo ne 'nahm wo suu ɓǝǝra.

Osoko

24 Osoko Dǝɓ mai moo gak byak we wo fan ma ɓee tǝ ɓal daŋ, ka cuu we bai ɓǝɓe' pel ah tǝkine laa pǝ'nyah pǝ yǝk ahe. 25 Masǝŋ matǝ vaŋno, pa ǝ̃ǝ mana, ne Yesu Kristu Dǝɓlii mana, mo yea pǝyǝk ne 'manne, mo yea ne swahe, mo yea Goŋe, daga cok mai mo pǝ̃ǝ kal ɓo, ne matǝ zǝzǝ̃ǝko tǝkine ma pel daŋ ga lii ga lii! Amen.