Yesu pee za syee mor ah jemma rǝŋ
1 Fahfal ah Yesu syen za syee mor ah jemma rǝŋ pee ra gwa gwa kal ge pel ah yaŋ daŋ tǝkine cok mai daŋ mo tǝ yah ga gŋ ne suu ahe. 2 Yesu so faa nyi ra: Yeɓ zah gwahl a pǝlli, amma za ma joŋ yeɓ ah ka pǝlli ya. We pǝǝ pah yeɓ ah ka mo peeko za yeɓ ge ka joŋ fagwahlle. 3 We gyo, me tǝ pee we ga tǝgbana wee pǝsǝ̃ǝ moo yea kǝsyil goobamme. 4 We tǝ ga ɓe, we ɓaŋ dah rǝk lak jol ka, we ɓaŋ dah rǝk fan ka, we woo sǝɓal ka, we uu haozah wo dǝɓ vaŋno tǝ fahlii ka ta. 5 We kal ge yaŋ makẽne we tǝ ga ɗǝr gŋ ɓe, we faa: Jam mo yea tǝ yaŋ maino. 6 Dǝɓ matǝ jam mo no gŋ ɓe, jam yea tǝ dǝɓ ahe, amma mo ka nai ya ɓe, haozah wol tǝ jam ɓii pii soo ge wo ɓiiri. 7 We kaa yaŋ moo ko za mo nyira farel nyi we ɓe, we re, mo nyira fazwan nyi we gŋ laŋ, we zwǝ ta. Mor dǝɓ ma joŋ yeɓ a no ne fahlii ka lwaa fan soo ahe. We kyãh yaŋ za kyãh ka. 8 Ne cok we ge yaŋ maki ah za yaŋ ah mo nyiŋra we ɓe, mo nyira farel nyi we ɓe, we re fan ahe. 9 We laɓ za syem yaŋ ahe, we faa nyi za yaŋ ahe: Goŋ Masǝŋ ge wo ɓii gwari ɓe. 10 Amma we ge yaŋ maki ah zan ah mo nyiŋra we ya ɓe, we pǝ̃ǝ ge uu tǝ fahlii tǝgǝǝ yaŋ ɓǝǝ we faa: 11 Koo ɓǝm yaŋ ɓii mai mo tǝ ɓal ɓuu laŋ ru tǝ kǝ̃ǝ ga tǝ ɓiiri, amma ne daŋ laŋ we tǝ njaŋ, Goŋ Masǝŋ ge ɓo gwari ne we. 12 Me faa nyi we, ne zah'nan ŋgoŋ kiita ɓe, bone matǝ yaŋ mai a ga kal mai mo ge tǝ yaŋ Sodoma.
Yaŋ mai mo zyii nyiŋra ya
(Mt 11:20-24)13 Ɓǝ gaɓ tǝtǝl ɓo yaŋ Korazin. Ɓǝ gaɓ tǝtǝl ɓo yaŋ Betsaida. Mor dǝǝbǝǝri mai mo joŋra ɓo yaŋ ɓii mo joŋ kǝnah ɓo yaŋ Tirus ne Sidon ɓe, ka zan ah toora bii ne ɓaa mbǝro dahsuu tǝkine woo sãh rǝk ga tǝtǝl ɓe. 14 Mor maiko ne zah'nan kiita ɓe, Masǝŋ ga ŋgoŋ kiita tǝ ɓii pǝgaɓ kal Tirus ne Sidon. 15 Amo yaŋ Kapernaum, mo lǝŋ mo yea pǝyǝk nai ŋhaa ga dai coksǝŋ ne? Mo ga lee ga sǝŋ ŋhaa mo ga pǝ cok mai za wul mo gŋ.
16 So faa nyi za syee mor ahe: Dǝɓ mo tǝ laa ɓǝ faa ɓii ɓe, ka tǝ laa ɓǝ faa ɓe ta. Dǝɓ mo ka tǝ zyii nyiŋ we ya ɓe, ka nyiŋ me ya ta. Dǝɓ mo laa ɓǝ faa ɓe ya ɓe, ka dǝɓ ah zyii laa ɓǝ faa Dǝɓ mai mo pee me ya ta.
Za syee mor Yesu matǝ jemma rǝŋ pii soora
17 Za matǝ jemma rǝŋ pii soora ne ɓǝ 'nyahre, ge faara nyi Yesu: Dǝɓlii, koo coksyiŋ laŋ, ru faa ɓǝ nyi pǝ tǝɗii ɓo ɓe, a laa zah ɓuuru. 18 So Yesu faa nyi ra: Me kwo Satan lee gin sǝŋ ge tǝgbana sãh bamme. 19 We ẽe ɗǝ, me nyi swah nyi we ka we syee tǝ soo ne dǝweri, so ka we dah swah pa syiŋ ɓii ne ɓalle, fan ki ka ga joŋ we ya. 20 We 'nyah suu mor coksyiŋ laa zah ɓii ka, amma suu mo 'nyah we mor tǝɗii ɓii ŋwǝǝ ɓo coksǝŋ.
Yesu laa pǝ'nyahre
(Mt 11:25-27Mt 13:16-17)21 Ne cok ah sǝ Yesu laa pǝ'nyah pǝ Tǝ'yak Matǝdaŋdaŋ faa: Daddǝ, Dǝɓlii sǝŋ tǝkine sǝrri, me joŋ osoko nyi mo, mor mo cuu fan mai mo muŋ ɓǝ ah ɓo wo za fatan ne za ma ne tǝtǝl daŋ nyi za mai mo feera fan ki ya. Oho Daddǝ, fan ah joŋ nai mor mo ye 'yah ɓo.
22 Pa ɓe nyi fan daŋ ɓo nyi me. Dǝɓ ka tǝ Wel ko ye zune ya, sai Pamme. So dǝɓ ka tǝ Pam ko ye zune ya, sai Welle, tǝkine dǝɓ mai Wel mo 'yah cuu nyi ko.
23 Yesu cii fahfal faa ɓǝ nyi za syee mor ah syak ɓǝǝra, faa: A pǝ'nyah wo ɓii ne kwan fan mai we tǝ kwanne. 24 'Manna me tǝ faa nyi we, profetoen pǝlli tǝkine za goŋ daŋ tǝ 'yahra ka kwan fan mai we tǝ kwan zǝzǝ̃ǝko, amma lwaara kwo ya, tǝ 'yahra ka laa ɓǝ mai we tǝ laani, amma lwaara laa ya.
Ɓǝ kikiŋ dǝɓ Samaria masãhe
25 Pa cuu ɓǝ lai maki ge fii Yesu ka lii ko, faa: Pa cuu fanne, me joŋ fẽe ka lwaa cee ma ga lii ne ne? 26 Yesu zyii faa nyi ko: Ɓǝ fẽe ye ŋwǝǝ ɓo pǝ ɓǝ lai man ne? Mo tǝ kee ɓe, mo laa gŋ ɗǝne? 27 Dǝɓ ah zyii faa: Mo 'yah Dǝɓlii Masǝŋ ɓo ne zahzyil ɓo daŋ, ne mazwãhsuu ɓo daŋ, ne swah suu ɓo tǝkine ɓǝ foo ɓo daŋ, mo so 'yah jǝk ɓo tǝgbana moo 'yah suu ɓo. 28 Yesu so faa nyi ko: Mo zyii ɓo pǝsãhe, mo ge joŋ naiko, mo ga yea ne cee.
29 Amma pa cuu ɓǝ lai 'yah ka joŋ suu ah njaŋ, so fii Yesu: Azu ye jǝk ɓe ne? 30 Yesu zyii faa: Dǝɓ ki ur gin Jerusalem tǝ ga Jeriko, za kaafuu ge joŋra ko fahlii, wǝǝra fan wo suu ah daŋ, ira ko, so soɓra ko ɓoo gŋ na wulli. 31 Pa joŋzahsyiŋ maki ah ge syee fahlii ahe. Ne cok mo ɓaŋ nahnǝn kwo dǝɓ ahe, so cak syee kah fahlii kalle. 32 Lewitiyo ge syee gŋ ta, kwo dǝɓ ahe, so cak syee kah fahlii kal ta. 33 Amma dǝɓ Samaria tǝ ga gwǝǝre, ge ɓaŋ fahlii nyẽe ta. Ne cok mo ge dai wo dǝɓ ah gwari, kwo ko, tǝtǝl 'mĩi ko tǝl ahe. 34 Syee ge wol ahe, rǝk nǝm ne bii lee kpuu vin ge zah nwãh ahe, so kiŋni, so ɓaŋ kan tǝ korro ah kal ge cok ɗǝr ne ki, byak ko gŋ. 35 Tǝ'nan ah woo solai gwa nyi pa byak cok ɗǝr gwǝǝ faa nyi ko: Mo byak dǝɓ nyẽeko, mo ɓeɓ fan ɓo kal tǝ mai me nyi mo ɓe, ne cok me jin ge tǝ pǝ̃ǝ ɓe, me ga soo mo ne ba. 36 Yesu so faa: Kǝsyil za matǝ sai rai mo kwo zu ye jǝk dǝɓ mai za kaafuu mo joŋra ko ne? 37 Pa cuu ɓǝ lai zyii faa: Ako ye dǝɓ mai mo kwo syak tǝl ahe. Yesu so faa nyi ko: Mo ge joŋ nai ta.
Yesu ge yaŋ Marta ne Maria
38 Yesu ɓaŋ fahlii ne za syee mor ah ge daira yaŋ maki ahe. Mawin ki no gŋ ɗii ne Marta, nyiŋ Yesu yaŋ ahe. 39 Naa mah ah mawin no a ɗii ne Maria, ge kaa mor ɓal Dǝɓlii tǝ laa ɓǝ cuu ahe. 40 Amma Marta tǝ gaɓ ne zah yeɓ camcam, so kal ge wo Yesu, faa: Dǝɓlii, mo kan syee ɓǝ mai naa ma ɓe mo soɓ me ɓo tǝ gaɓ ne yeɓ syak ɓe ya ne? Mo faa nyi ko mo gbahko jol ɓe ne yeɓɓe. 41 Dǝɓlii zyii faa nyi ko: Marta, Marta, mo tǝ gaɓ suu ɓo tǝkine swaa ɓǝ mor fan camcam pǝlli. 42 Amma fan malii ah a vaŋno, Maria nǝǝ zah fan masãh ah ɓo, fan ah laŋ ka woŋ ki ne ki yao.
© Bible Moundang © Alliance Biblique du Tchad, 1996.
