Za keera ɓǝ faɓe' ɓǝǝra
1 Ne zah'nan jemma gwa pǝzyil fĩi moo ta, za Israel so taira ka syẽe fan ma cuu tǝ swaara ɓǝ faɓe' ɓǝǝ mo joŋra ɓo, ɓaara mbǝro dahsuu, woora sǝr rǝk ge tǝtǝlli. 2 Ara daŋ woŋra ki ne za mai mo ye ka yahuduen a. So urra, tǝŋra ne kee ɓǝ faɓe' mai mo joŋra, ne mǝ pa ɓǝǝ lii ra daŋ. 3 Keera ɓǝ lai Dǝɓlii Masǝŋ ɓǝǝ nyi ra cok com sai, so cok com sai maki ah faɗa, keera ɓǝ faɓe' ɓǝǝra, tǝkine juupel wo Masǝŋ.
4 Zyeɓra cok ul ma sǝŋ ah ɓo no mor Lewitien, Joswa, Bani, Kadmiel, Sebania, Bunni, Serebia, Bani, ne Kenani, uura gŋ, juura pel wo Dǝɓlii Masǝŋ ɓǝǝ ne kyaŋ lii.
5 So Lewitien manyeeki ah faɗa - Joswa, Kadmiel, Bani, Haskabnia, Serebia, Hodia, Sebania, ne Petaja - faara nyi za: We ur sǝŋ, we yii Dǝɓlii Masǝŋ ɓiiri, we yii ko ga lii ga lii. Dǝɓlii, koo zune daŋ mo yii yǝk tǝɗii ɓo mai ɓǝ ah mo kal tǝ faa ga zah ɓo.
Juupel ma toobii
6 Fahfal ah so juura pel naiko:
Dǝɓlii, amo syak ɓo, mo ye Dǝɓlii, amo ye joŋ coksǝŋ, tǝkine ŋwǝǝmǝŋgai ma coksǝŋ, amo ye joŋ sǝrri, ne fan mai mo no gŋ, mo ye joŋ mabii ne fan mai mo no mor ah daŋ ta. Amo ye nyi cee nyi fan joŋ ɓo daŋ, swah ma coksǝŋ ra daŋ a keara sǝŋ juupel wo ɓo.
7 Amo, Dǝɓlii Masǝŋ, mo ye nǝǝ Abram, mo zaŋ ko pǝ̃ǝ gin Ur sǝr Babilon ne ko, mo so fer ɗii ah ɗii ne Abraham. 8 Mo lwaa ko, ako ye dǝɓ matǝ goŋga pel ɓo. So mo gbǝ zah ne ki, mo faa nyi zye ga nyi sǝr Kanaan nyi ko, sǝr mai Hetien, Amorien, Perisien, Jebusien, Girgasien mo kaara ɓo gŋ, ka morsǝ̃ǝ ah mo kaara gŋ. So mo joŋ ɓǝ faa ɓo mo faa baa ge cok ahe, mor amo ye Dǝɓ tǝ goŋga.
9 Amo kwo bone mai pa ɓuu lii ra mo laara sǝr Egiɓ, so mo laa yee ɓǝǝ mo tǝ yeera fii gbah jol ne zah mabii Syẽ. 10 Mo joŋ dǝǝbǝǝri ne yeɓ matǝ gǝriŋ ah wo Farao, ne zaluu pel ah ne za sǝr ahe, mor mo tǝ ɓǝ bone mai mo cuura nyi za ɓo ɓe. Mo joŋ ka tǝɗii ɓo mo zoo tǝgbana mai mo no tǝ'nahko. 11 Mo ŋgǝ̃ǝ fahlii mor za ɓo kǝsyil mabii, mo zaŋ ra syee gŋ ne tǝ sǝr yakke. Amma za mai mo tǝ foora mor ɓǝǝra, amo jǝŋ mabii ge tǝ ɓǝǝ tǝgbana tǝsal mai dǝɓ moo 'nǝǝ ga pǝ bii mai mo tǝ ɗuu ne swahe, kalra ge mor bii tǝɗe'. 12 Mo pee swãh bam syee ne ra ne comme, ne suŋ ɓe, mo soɓ wii sǝǝ cok pel ɓǝǝra.
13 Mo ɗǝr gin coksǝŋ ge tǝ waa Sinai, mo faa ɓǝ ne za ɓo gŋ mo nyi ɓǝ lai masãh ah nyi ra tǝkine ɓǝ cuu ɓo ra. 14 Mo faa nyi ra mo gbǝra zah'nan com 'yak ɓo pǝsãhe, mo nyi ɓǝ lai ɓo ra nyi ra ne jol dǝɓ yeɓ ɓo Mosus.
15 Ne cok koŋ mo i ra, mo nyi farel ma coksǝŋ nyi ra. Ne cok koŋ bii mo i ra, mo ɓal bii tǝ pǝɗakka nyi ra zwahe. Mo so faa nyi ra, mo danra ge pǝ sǝr mai mo faa ɓǝ ah ɓo ka nyi nyi ra, ka mo rera.
16 Amma pa ɓuu lii ra yiira suu, yerra zahzyil ɓǝǝra, zyiira ka syee mor ɓǝ lai ɓo ra ya. 17 Zyiira ka laa zah ɓo ya, yaŋra ɓǝ dǝǝbǝǝri mai mo joŋ mor ɓǝǝra, yiira suu ɓǝǝ nǝǝra dǝɓlii maki ahe, ka mo kalko pel ɓǝǝ ka pii soo ga pǝ byak sǝr Egiɓ ne ra. Amma amo ye Masǝŋ ma rõm zana, amo gboŋgboŋ, mo ne 'yahe, mo ka ɓaŋ kpãh gwari ya. Kwan syak ɓo moo kwan a pǝ'manne, mo soɓ ra ya. 18 Coora we dǝǝ ne vãmme, so faara, Masǝŋ mai mo zaŋ ra pǝ̃ǝ gin sǝr Egiɓ ne yo! Ne fahlii mai faara ɓǝ maɓe' ah ɓo pǝ'manne Dǝɓlii. 19 Amma ne daŋ laŋ, mo soɓ ra myah kǝsyicok ya, mor amo kwan syak pǝlli. Amo cak swãh bam ne wii mai moo syee ne ra ne com ne suŋ daŋ ya. 20 Ne ɓǝ sãh ɓo mo ne ko mo so cuu fan mai ka mo joŋra nyi ra, mo nyi manna nyi ra re kǝ̃ǝre, mo nyi bii nyi ra zwah ta. 21 Ne cok mo joŋra syii jemma nai kǝsyicokki, amo nyi fan mai ara mo ne 'yah ah daŋ nyi ra. Fan wo suu ɓǝǝ ɓeɓ ya, ɓal ɓǝǝ fuu ya.
22 Mo soɓ ra re sǝr goŋ camcam ne za camcam mai mo gbahra zahsyee ɓo ne ra. Rera sǝr Hesbon mai Sihon mo kaa goŋ ah ɓo, rera sǝr Basan, Og ye kaa goŋ ah ɓo. 23 Mo nyi wee nyi ra pǝpãa tǝgbana ŋwǝǝmǝŋgai sǝŋ, so mo soɓ wee ɓǝǝ rera sǝr mai mo faa ɓǝ ah nyi pa ɓǝǝ lii ra ka nyi nyi ra, so kaara gŋ. 24 Rera sǝr Kanaan, amo tǝr swah za mai mo kaara ɓo gŋ. Mo nyi swah nyi za ɓo ka mo joŋra ne za sǝr Kanaan ne za goŋ ah daŋ na mai zahzyil ɓǝǝ mo 'yahe. 25 Za ɓo rera yaŋ maswah ah ra ne sǝr ma joŋ fan lii ahe, ne yaŋ mai fan mo baa ɓo ɓǝr ah ra gǝɓgǝɓ, ne lak bii mai mo ciira ɓo, kpuu ma lee syẽm camcam, ne 'wah kpuu vin a renra fan mai zahzyil ɓǝǝ mo ne 'yah ah daŋ, ŋhaa ŋwaara ne ko laara pǝ'nyah ne fan sãh camcam mai mo nyi nyi ra.
26 Amma so za ɓo ŋwoora kyaŋ zyiira ka laa zah ɓo ya, soɓra ɓǝ lai ɓo ɓoo. Ikra profetoen ɓo mai moo lai ra moo faara nyi ra mo piira soo ge wo ɓo ge lalle. Pǝ cok com vaŋno vaŋno daŋ, a tǝǝra mo gŋ. 27 Mor ahe, mo soɓ za syiŋ ɓǝǝ ge re ra, kaara swah tǝ ɓǝǝra. So pǝ bone ɓǝǝ ara mo gŋ, yera yee ɗii mo ka mo gbah jol ɓǝǝra. Mo so laa ge coksǝŋ. Ne kwan syak lii ɓo moo kwanne, mo so pee zaluu manyeeki ah ka mo ge ǝ̃ǝ ra gin jol za syiŋ ɓǝǝra. 28 Amma ne cok mo lwaara 'yakke so tǝŋra ne joŋ faɓe' faɗa, mo so soɓ za syiŋ ɓǝǝ ge re ra kpǝ. So ne cok mo ɗiira marvǝǝ, mo so fiira mo ka mo ǝ̃ǝ ra, mo so laa ge coksǝŋ, mor kwan syak lii ɓo mai mo ne ko, mo ǝ̃ǝ ra ɓal pǝpãare. 29 Mo lai ra ka mo syeera mor ɓǝ cuu ɓo ra, amma yiira suu ɓǝǝra, ɓoora ɓǝ lai ɓo mai moo cuu fahlii kal masãh nyi dǝɓ ge lalle. Joŋra tǝtǝl ɓǝǝ pǝyakke, yerra zahzyilli, zyiira ka laa zah ya. 30 Syii daŋ mo tǝ rõm ra, mo lai ra, profetoen ɓo faara ɓǝ nyi ra, amma za ɓo zyiira ka laa ya. Mor ah mo soɓ ra ge mor jol za ki. 31 So mor kwan syak ɓo moo kwan a pǝ'manne, mo yaŋ ra wala muŋ ra ya. Mor amo ye Masǝŋ matǝ gboŋgboŋ, ne ma kwan syak lii.
32 Zǝzǝ̃ǝko Masǝŋ, Masǝŋ ɓuuru, amo pǝyǝkki, mo pǝrengalle, amo pǝswahe, amo uu ɓo tǝ ɓǝ gbanzah ɓo, mo gbǝ ɓo pǝsãhe. Daga ne cok mai za goŋ Asiria mo tǝŋ cuura bone nyi ru, ŋhaa ge dai tǝ'nahko, ru laa bone ɓo pǝlli. Za goŋ ɓuuru, ne zaluu ɓuuru, ne za joŋzahsyiŋ ɓuu ne profetoen, ne pa ɓuu lii ra tǝkine za ɓuu daŋ, ru laa bone ɓo no cam. Mo foo ɓǝ bone mai ru laa ɓo. 33 Amo joŋ ɓo pǝsãh ne ŋgoŋ kiita tǝ ɓuu naiko. Amo ye Dǝɓ tǝ goŋga, amma aru joŋ faɓe'. 34 Pa ɓuu lii ra, ne za goŋ ɓuu ne zaluu tǝkine za joŋzahsyiŋ daŋ gbǝra ɓǝ lai ɓo ya, zyii ka laara ɓǝ faa ɓo ra ne lai ɓo mo lai ra ya. 35 Mo joŋ gboŋgboŋ wo ɓǝǝra, ara ne za goŋ ɓǝǝra, ne cok ah mo nyi sǝr ma'ah ma joŋ fan lii nyi ra, amma ne daŋ laŋ zyii soɓra faɓe' ɓǝǝ ka so joŋ mor ɓo ya. 36 Zǝzǝ̃ǝko ru so ciŋ byak ɓo pǝ sǝr mai mo nyi ɓo nyi ru, sǝr ma joŋ fan lii mo nyi ɓo nyi ru, ka mo joŋ farel nyi ru. 37 Fakpãhpǝǝ mai sǝr ah mo joŋ daŋ, a so ga jol za goŋ mai mo soɓ ra lwaa ru ɓo, mor faɓe' mai ru joŋni. A joŋra ne ru, ne dǝǝ ɓuu tǝkine gwii ɓuu daŋ tǝgbana mai zahzyil ɓǝǝ mo 'yahe. Aru dan bone ɓo pǝ'man no cam.
Za gbǝra zahe
38 Mor fan marai daŋ mo joŋni, aru Yahuduen ru gbǝ zahe, ru so ŋwǝǝ ɓǝ gbanzah ahe, so zaluu ɓuu ne Lewitien ɓuu tǝkine za joŋzahsyiŋ ɓuu daŋ kanra lamba ɓǝǝ gŋ .
© Bible Moundang © Alliance Biblique du Tchad, 1996.
