Masǝŋ tǝkine zan ahe
1 We joŋ osoko nyi Dǝɓlii,
We faa ɓǝ yǝk ahe,
We cuu ɓǝ fan mai mo joŋko ɓo nyi zana .
2 We ɗǝǝ lǝŋ yii ko ne ko,
We faa ɓǝ yeɓ matǝ gǝriŋ ah mai mo joŋko nyi zana.
3 We laa pǝ'nyah mor awe ye zan ahe.
Awe za ma ɗuu Dǝɓlii daŋ, we laa pǝ'nyahre.
4 We ge wo Dǝɓlii,
We fii gbah jol wol ahe,
We yea pel ah cẽecẽe.
5-6 Awe morsǝ̃ǝ Abraham dǝɓ yeɓ ahe,
Awe morsǝ̃ǝ Yakuɓ dǝɓ mai mo nǝǝko ɓo,
We foo ɓǝ dǝǝbǝǝri ah mayǝk matǝ gǝriŋ ne kiita mai mo ŋgoŋko ɓo.
7 Dǝɓlii ako ye Masǝŋ mana,
Ɓǝ lai ah ra a mor za sǝr daŋ.
8 Ka yaŋ ɓǝ gbanzah ah ya ŋhaa ga lii,
Ɓǝ faa ah mo faa ɓo a mor zahŋhǝǝtǝ̃ǝ ma fahfal ga lii ga lii.
9 A foo ɓǝ gbanzah mai mo gbǝ ɓo ne Abraham tǝkine haazah ah mo haa nyi Isak.
10 Dǝɓlii gbǝ zah ma ga lii ne za Israel,
Gbǝ zah ma ga lii ne Yakuɓ ne cok mo faa:
11 Me ga nyi sǝr Kanaan nyi mo,
A ga ciŋ ma ɓo.
12 Ne cok ah za Israel ara ka pǝpãar a,
Ara ye gwǝǝ tǝ sǝr ahe.
13 A kyãhra pǝ sǝr za ki,
A urra gin pǝ sǝr goŋ mai ga sǝr goŋ maki ahe.
14 Amma Masǝŋ soɓ koo dǝɓ vaŋno cuu bone nyi ra ya,
A lai za goŋ camcam tǝ ɓǝǝra.
15 A faa: We juu za ɓe mai me syen ra ɓo ka,
We joŋ ɓǝɓe' wo profetoen ɓe ra ka.
16 Ne cok Dǝɓlii mo pee koŋ ge sǝr ɓǝǝra,
Dǝfuu lwaara farel a,
17 Pee Yuseɓ kal ge pel ɓǝǝ sǝr Egiɓ,
So ge gbǝra ko lee gŋ na byakke.
18 Gaara ɓal ah ne ŋgǝyam,
Ɓoora celeelu nyi solle.
19 Kaa pǝ daŋgai ah ŋhaa ɓǝ lom ah mai mo looko ge joŋ ge cok ahe.
Ɓǝ faa Dǝɓlii cuu ako ye dǝɓ matǝ goŋga.
20 So goŋ sǝr Egiɓ pee za wǝǝra ko ɓoo.
21 Ɓaŋ ko kan govener ne tǝ sǝr ah daŋ.
22 Nyi swah nyi ko tǝ za faadal maluu daŋ,
A ne fahlii ka lai ra tǝgbana zahzyil ah mo 'yahe.
23 So Yakuɓ ur kal ge sǝr Egiɓ ge kaa gŋ.
24 Dǝɓlii joŋ zan ah bem wee pǝlli,
Joŋ ra pǝswah kal za syiŋ ɓǝǝra.
25 Dǝɓlii joŋ ka za sǝr Egiɓ mo syiŋra zan ahe,
So joŋra ra vǝrvǝrri.
26 Fahfal ah Dǝɓlii so pee dǝɓ yeɓ ah Mosus ne Aron mai mo syen ra.
27 Joŋra yeɓ maluu Masǝŋ mo cuu nyi ra,
Joŋra dǝǝbǝǝri tǝ sǝr Egiɓ.
28 Masǝŋ pee cokfuu ge tǝ sǝr ahe,
Amma za sǝr Egiɓ zyii syeera mor ɓǝ faa ah ya.
29 So fer bii sǝr ɓǝǝ ciŋ syimmi,
Syiŋ ma pǝ bii ɓǝǝ daŋ wukra.
30 Joŋ manjaktǝril yee ge baa sǝr ɓǝǝ kǝrkǝr ŋhaa ne cok kal goŋ daŋ.
31 Masǝŋ pee kŋ lwǝǝ suu ne ŋwǝǝ ge baa sǝr ah daŋ.
32 Pee syaŋ ne sãh bam ge sǝr ɓǝǝ zahwaa bamme.
33 Ge ɓeɓ kpuu vin ɓǝǝ ne kpuu wuu ɓǝǝra,
Hah kpuu ah ra ge sǝŋ.
34 Pee tǝzyee ge pǝlli,
35 Rera fan ma ciciŋ tǝkine fakpãhpǝǝ sǝr ah daŋ belbelle.
36 So ik welii ɓǝr yaŋ sǝr Egiɓ vaŋno vaŋno daŋ pǝ wulli.
37 So pǝ̃ǝ ne za Israel,
Woora vãm solai ne vãm kaŋnyeeri ɓǝǝ mor jolle,
Ara ne suu tǝ jam ta.
38 Ne cok mo pǝ̃ǝra ka kalle, za sǝr Egiɓ laara pǝ'nyahre,
Mor a ɗuura gal za Israel.
39 So pee swãh tǝtǝl zan ahe,
Pee wii ka mo sǝǝ cok pel ɓǝǝ ne suŋni.
40 Fiira nǝǝ, so Masǝŋ pee juu nyi ra,
Pee farel gin sǝŋ ge nyi ra, ryakra kǝ̃ǝre.
41 So ŋgǝ̃ǝ pǝɗakka, bii pǝ̃ǝ gŋ ge lalle,
Ɗuu tǝ sǝr kol tǝgbana tǝ ɗuu pǝ elle.
42 Mor a foo ɓǝ faa ah mai mo faa ɓo nyi dǝɓ yeɓ ah Abraham.
43 Masǝŋ zaŋ zan ah mai mo syen ra ɓo pǝ̃ǝ ne ko ne ɗǝǝ lǝŋ ne laa pǝ'nyahre.
44 Nyi sǝr za ki nyi ra,
Nyiŋra fakpãhpǝǝ 'wah ɓǝǝ kaa ne ko.
45 Joŋ nai ka zan ah mo laara zah ah mo syeera mor ɓǝ lai ahe.
Na yii Dǝɓlii!
© Bible Moundang © Alliance Biblique du Tchad, 1996.
