Lǝŋ yii Dǝɓlii
1-2 We yii Dǝɓlii!
Awe za yeɓ Dǝɓlii mai we uu ɓo yaŋ ahe, mai we uu ɓo piicel yaŋ Masǝŋ mana,
We yii tǝɗii ahe.
3 We yii Dǝɓlii mor ako ye Dǝɓ sãhe,
We ɗǝǝ lǝŋ yii tǝɗii ah ne ko mor ako ye pa kwan syakke.
4 Nǝǝ Yakuɓ mor suu ahe,
Za Israel ma syak ah yo.
5 Me tǝ ɓe, Dǝɓlii man a pǝyǝkki,
A pǝyǝk kal masǝŋ ki ra daŋ.
6 A joŋ fan mai mo tǝ 'yahko pǝ coksǝŋ ne tǝ sǝrri ne pǝ bii tǝkine mor ah ma sǝŋ daŋ.
7 Ako yee joŋ swãh bam ur nyah sǝr nai daŋ,
A joŋ bam sãhni a so tanne,
Ako yee soɓ zyak kuu ta.
8 Ako ye ik wee lii sǝr Egiɓ ne mǝ faɓal daŋ.
9 Joŋ dǝǝbǝǝri matǝ gǝriŋ ah ka lai Farao ne tǝkine zaluu ah daŋ.
10 Vǝr za camcam pǝlli,
Ik za goŋ maswah ah ra pǝ wulli:
11 Sihon goŋ Amorien ne Og goŋ Basan tǝkine za goŋ ma pǝ sǝr
Kanaan daŋ.
12 Nyi sǝr ɓǝǝ nyi zan ah Israel.
13 Dǝɓlii, za ga tǝra cẽecẽe amo ye Masǝŋ,
Zahŋhǝǝtǝ̃ǝ ma fahfal daŋ a ga foora ɓǝ ɓo.
14 Dǝɓlii ga kwo syak tǝ zan ahe,
A ga wǝǝ za yeɓ ah myahe.
15 Masǝŋ za gwǝǝ daŋ zyeɓra ne vãm solai ne vãm kaŋnyeeri,
Dǝfuu ye zyeɓ ra ɓo ne jolle.
16 Ara ne zahe, amma ka gak faara ɓǝ ya.
Ara ne nahnǝnni, amma ka gak kwan cok ya.
17 Ara ne sokki, amma ka laa ɓǝ ya.
Ka ira tǝ'yak ya.
18 Za mai mo joŋra ra, ne za mai mo soɓra suu ɓǝǝ ɓo wo ɓǝǝra, mo yeara tǝgbana masǝŋ ki mai mo joŋra.
19 Za Israel, we yii Dǝɓlii.
Awe za joŋzahsyiŋ Masǝŋ, we yii ko.
20 Awe Lewitien, we yii Dǝɓlii.
Awe za ma ɗuura ko daŋ, we yii ko.
21 We yii Dǝɓlii mai mo kaa ɓo Sion, pǝ yaŋ ah yaŋ Jerusalem.
Na yii Dǝɓlii!
© Bible Moundang © Alliance Biblique du Tchad, 1996.
