Mawin tǝkine dragoŋ
1 Fan ma cuu fan malii ah joŋ coksǝŋ. Mawin ɓoo com ɓo na mbǝro, fĩi no mor ɓal ahe, maa njok ma ne ŋwǝǝmǝŋgai jemma tǝtǝl gwa ɓo tǝtǝlli. 2 Mawin ah tǝ kyeɓ ka byaŋ we worre, bone byaŋ tǝkine ɓǝr syen byaŋ joŋ ko tǝ ɓyaŋ ɓǝ.
3 Fan ma cuu fan maki ah joŋ coksǝŋ faɗa. Dragoŋ malii masyẽ mai mo ne tǝtǝl rǝŋ ne ciŋ jemma, maa njok vãm ɓo tǝtǝl ah ra daŋ. 4 Ɓaŋ sǝ̃ǝ ah gbah fah kǝ sai ŋwǝǝmǝŋgai ma coksǝŋ ne ko, myah ge tǝ sǝrri. So ge uu pel mawin mai mo tǝ ga byaŋ we worre, mor ka sǝ̃ǝ wel ah mo tǝ ga byaŋko. 5 So mawin ah byaŋ we worre, a ga kaa goŋ tǝ za sǝr daŋ ne kǝndaŋ vãmme. Amma so ɓaŋra wel ah kal ge wo Masǝŋ ne pǝ cok fakal ah mo gŋ. 6 Mawin ah ɗuu kal ge kǝsyicok pǝ cok mai Masǝŋ mo zyeɓ ɓo mor ah ka ga wol ko gŋ zah'nan ujenere ne temere gwa ne jemma yea.
7 So sal ur coksǝŋ. Mikal ne angeloi ah tǝ ruura sal ne dragoŋ mai mo tǝ ruu sal ne ra ne angeloi mǝ ahe. 8 Amma dragoŋ lwaa kaa kacella ya, so ako ne angeloi ah lwaara fahlii ka kaa coksǝŋ yao. 9 Ɓaŋra dragoŋ malii ɓoo ge lalle, ako ye soo matam ma ɗii ne Dǝɓ Ɓe' wala Satan, mai mo tǝ zyak za sǝr ne lii ah daŋ. Ɓoora ko ge tǝ sǝr ne angeloi ah ra daŋ.
10 So me laa kyaŋ pǝ'man ge coksǝŋ faa: Zǝzǝ̃ǝko ǝ̃ǝ Masǝŋ ge ɓe! zǝzǝ̃ǝko Masǝŋ cuu swah goŋ ah ɓe! zǝzǝ̃ǝ Kristu ah cuu yǝk ah ge lal ɓe! Mor pa ma cen wee pa mana, dǝɓ mai moo uu pel Masǝŋ man mor ka cen ra com ne suŋ daŋ, ɓaŋra ko coksǝŋ ɓoo ge lal ɓe. 11 Wee pa man kaara kacella tǝl ahe, mor syim Wepǝsãhmme, tǝkine goŋga mai mo cuura, mor 'yahra soɓ cee suu ɓǝǝ ka rǝ wukki. 12 Mor maiko, awe coksǝŋ ne za ma kaara gŋ daŋ, we laa pǝ'nyahre! Amma ɓǝ gaɓ a tǝ sǝr tǝkine mabii! Mor Satan ɗǝr ge ɓo wo ɓiiri, ɓaŋ kpãh ɓo pǝ'manne, mor tǝ ɓe, cok ah coŋ ɓo biŋ nai to.
13 Ne cok dragoŋ mo kwo ɓoora ko ge ɓo tǝ sǝrri, so kal ne foo mor mawin mai mo byaŋ we wor ɓo. 14 Amma mawin ah ɗǝǝ yee gwa na mǝ dǝɗuŋ malii ahe, mor ka mo zooko kal ge pǝ cok ah fah cok ne ko, pǝ cok mai moo ga wolra ko gŋ, tǝgbana syii sai ne raita, pǝ cok mai soo mo ka gaɓ ko gŋ ya. 15 So soo zuu bii pǝ zah ah ge fahfal mawin ah tǝgbana bii pǝ elle, mor ka bii ah mo ɓaŋ ko kal ne ko. 16 Amma sǝr gbah jol mawin ahe, sǝr ǝǝ zah zwǝ bii mai dragoŋ mo zuu gin pǝ zah ah ge lalle. 17 Dragoŋ ɓaŋ kpãh tǝ mawin ah pǝ'manne, ge ruu sal ne tǝcoŋ morsǝ̃ǝ ah ra, za mai daŋ moo syeera mor ɓǝ lai Masǝŋ tǝkine gban goŋga mai Yesu mo ge cuu ɓo. 18 So dragoŋ ge uu tǝ tǝkuu zahbii.
© Bible Moundang © Alliance Biblique du Tchad, 1996.
