Ɗii za ka toobii
1 We tai, awe za bai swãare, we tai we zyeɓ ɓǝ suu ɓiiri, 2 kǝpel mai ka we ɓah wuk tǝgbana fãi fan a ba, kǝpel mai ka kpãh Dǝɓlii ge tǝ ɓii ka syen we na wii ya ba, kǝpel zah'nan mai moo ga cuuko kpãh ah gin lal ne ko ge ya ba. 3 Awe za ma wonsuu ah we pǝ sǝr mai wee syee mor ɓǝ lai Dǝɓlii daŋ, we ge wol ahe, we joŋ fan masãh ahe, we won suu ɓiiri. Ɗah maki we ga ǝ̃ǝ jol kiita ne zah'nan mai Dǝɓlii moo ga cuu kpãh ah gin lal ne no ne?
Kiita tǝ za mai mo kaara ryaŋ sǝr Israel ɓo
4 Koo dǝɓ vaŋno laŋ ka ga coŋ yaŋ Gaza ya. Yaŋ Askalon a ga ciŋ cok kolle, za yaŋ Asdod za syiŋ ɓǝǝ ga nĩi ra ka com kǝsyitǝtǝl dai ya ba, za yaŋ Ekron laŋ za ki ga muŋ ra. 5 Ɓǝ gaɓ tǝtǝl ɓii Filistien za mai we kaa ɓo kah mabii. Dǝɓlii faa ɓǝ magaɓ ah ɓo tǝtǝl ɓiiri, a ga muŋ we, koo dǝɓ vaŋno laŋ ka ga coŋ ya. 6 Sǝr ɓii ma kah mabii ga ciŋ tǝbǝǝ mai moo ga piira gwii gŋ. 7 Za Yuda mai mo coŋra ɓo ga rera sǝr ahe, a ga piira ŋgaɓ fan ɓǝǝ gŋ, a ga swahra pǝ yaŋ Askalon. Dǝɓlii Masǝŋ ɓǝǝ a ga yea ne ra, a ga joŋ ra kaa jam faɗa.
8 Dǝɓlii ma ne swah daŋ faa: Ame laa tǝǝ mai za Moab ne za Ammon mo tǝ tǝǝra za ɓe ne faa ɓǝɓe' tǝtǝl ɓǝǝ ɓe, a yiira suu tǝ ɓǝǝ ne faa rǝ ga re sǝr ɓǝǝra. 21:33-37; 25:1-11; Am 1:13-15 9 'Manna tǝgbana ame ye me Masǝŋ Israel ma ne cee, me haa na zahe, sǝr Moab ne sǝr Ammon a ga muŋ tǝgbana yaŋ Sodoma ne Gomorra. Sǝr ah ra a ga ciŋ cok mai waa mo gŋ, ne cok mai moo nǝǝra tǝm gŋ tǝkine gboŋ ga lii ga lii. Za ɓe mai mo coŋra ɓo, a ga ɗaŋra, a rera sǝr ɓǝǝra.
10 Za Moab ne za Ammon a ga lwaara kiita nai mor a yiira suu tǝkine tǝǝ za Dǝɓlii ma ne swah daŋ. 11 Dǝɓlii ga joŋ ka gal mo re ra, a ga vǝr ɓǝ masǝŋ ki ra daŋ gin wo sǝrri. So za sǝr camcam daŋ a ga juura pel wol ahe, zune daŋ a ga juu pǝ sǝr ahe.
12 Awe Etiopien, Dǝɓlii ga ik we pǝ wul ta.
13 Dǝɓlii ga cuu swah ah ka muŋ Asiria sǝr ma fahsǝŋ ko. A ga joŋ yaŋ Niniwe na gboŋni, tǝgbana cok mayak ahe. 14 Ŋgaɓ fan ne kul fan camcam ga swahra gŋ, zahban faɓal camcam daŋ. Woŋguu a ga kaara pǝ gboŋ ahe, a ga cwǝǝra zahtǝwoo yaŋ ah ra a ga yera yee gŋ, tǝmgbuu a ga cwǝǝra tǝ zahfah ah ra ka yeyee gŋ, kpuu bah mai mo gbǝra yaŋ ah ɓo ne ko, a ga nǝǝ ga lalle. 15 Fan mai daŋ a ga joŋ wo yaŋ malii nyẽe moo yii suu ahe, moo so lǝŋ zye ga kaa jam. Za yaŋ ah a lǝŋra yaŋ ɓǝǝ pǝ'man kal yaŋ maluu mo wo sǝr daŋ. Kai, yaŋ ah ciŋ cok kol ɓe, ciŋ cok mai nǝǝ cok moo ga swahra gŋ ɓe. Koo zune mo ge pǝ̃ǝ gŋ ɓe daŋ, a ga wetǝwel tǝl ah a kǝ̃ǝ jol tǝ ɓǝ ahe.
© Bible Moundang © Alliance Biblique du Tchad, 1996.
