Ikra morsǝ̃ǝ Saul pǝ wulli
1 Ne cok zah'nan David, koŋ ge wǝ syii sai. David fii Dǝɓlii. Dǝɓlii faa nyi ko: Ɓǝɓe' no tǝ Saul ne za yaŋ ah tǝ ɓǝ ik Gibeonien. 2 Goŋ ɗii Gibeonien ka faa ɓǝ nyi ra. (Gibeonien ara ka kǝsyil za Israel a, amma tǝcoŋ za Amorien ye ra, za Israel taira ki ɓo ne ra ne haa zah nyi ra. Amma Saul kyeɓ ra ne tǝwon ah ka ik ra ga lal mor za Israel ne za Yuda.) 3 David faa nyi Gibeonien: Me ga joŋ fẽe ɗah mor ɓii ne? Me ga zyeɓ ɓǝ ɓii ne fẽe ka we ẽe za Dǝɓlii ne? 4 Gibeonien zyiira zah ah faa: Ɓǝ solai tǝkine vãm kaŋnyeeri ye ka kǝsyil ɓuu ne Saul tǝkine za yaŋ ah ya. Ɓǝ ɓuu ye ka laŋ ka ru i dǝɓ kǝsyil za Israel a ta. Goŋ fii ra: We 'yah me joŋ fẽe nyi we ne? 5 So faara nyi goŋe: Dǝɓ mai mo vǝr ru a 'yah kǝnah ka muŋ ru tǝɗe' mor ka ru coŋ tǝ sǝr Israel ka. 6 Mo nyi za rǝŋ nyi ru kǝsyil wee ah ka ru ge rao ra ge sǝŋ pel Dǝɓlii Gibea mǝ Saul mai Dǝɓlii mo nǝǝ ɓo. Goŋ faa: Me ga nyi ra nyi we.
7 Amma goŋ soɓ Mefiboset we Yunatan we Saul, mor haazah mai David ne Yunatan we Saul mo haara kǝsyil ki pel Dǝɓlii. 8 David woo wee matǝ gwa mai Rispa mǝlaŋ Aja mo bem ne Saul: Armoni ne Mefiboset, tǝkine wee matǝ dappe mai Meraɓ mǝlaŋ Saul mo bem ne Adriel we Barzilai Meholatiyo. 9 Woo ra nyi Gibeonien, ge raora tǝ waa pel Dǝɓlii, wukra zahki rǝŋ daŋ, ikra ra ge lal ne cok gwahlle, ɓǝ ah joŋ ne tǝtǝŋ cen zyemĩirĩ ne patǝ vaŋno zah'nan ahe .
10 Rispa mǝlaŋ Aja ɓaŋ tãa yerri ge rǝǝ tǝ pǝɗakka mai wul ɓǝǝ mo rǝk ɓo gŋ, swǝ tǝl ah daga ne cok cen zyemĩirĩ ŋhaa zah bam ge daini. Ne com ka soɓ juu tan tǝ ɓǝǝr a, ne suŋ laŋ ka soɓ fafyãh gin a.
11 Ge keera ɓǝ mai Rispa mǝlaŋ Aja mabyak Saul mo joŋ nyi David. 12 David kal ge woo woiŋ Saul ne mǝ nan ah Yunatan jol za yaŋ Jabes ma Giliat. (Mor lal woora gin pǝ cok ma tǝgbai ma Bet-San mai Filistien mo rao ra gŋ ne cok mai Filistien mo ira Saul tǝ waa Gilboa.) 13 David woo woiŋ Saul ne mǝ nan ah Yunatan gin ŋhaa ge ne ko, taira woiŋ za matǝ rǝŋ mai mo raora ra kŋ gŋ ta. 14 Ge ciira woiŋ Saul ne mǝ nan ah Yunatan tǝkine mǝ za mai mo raora ra kŋ daŋ Zeela pǝ sǝr Benyaamin pǝ pal Kis pah Saul, joŋra fan mai goŋ mo faa ɓǝ ah daŋ. Fahfal ah Masǝŋ kwo syak tǝ sǝrri.
Za David ruura sal ne Filistien
15 Filistien pǝ̃ǝra ka ruu sal ne za Israel faɗa, David ge ne zan ah daŋ ge ruura sal ne Filistien. David gaɓ ɓe. 16 So Jisbibenoɓ dǝɓ kǝsyil Refaimien kyeɓ ka in David pǝ wulli. Yǝk zǝǝ ah nǝn kilo sai ne raita, ɓoo kafahe mafuu ah ɓo kahlaa, mor ah lǝŋ zye gak i David. 17 Amma Abisai we Seruja ge gbah jol David, i Filistiyo pǝ wulli. Ne cok ah za David haara zah nyi ko faa: Mo ka fǝ̃ǝ ga zah sal ne ru yao, mor ka ru yea bai goŋ ka.
18 Fahfal ah za Israel ruura sal ne Filistien cok ma ɗii ne Goɓ. Ne cok ah Sibbekai ma Huska i Saf dǝɓ kǝsyil Refaimien pǝ wulli.
19 So ruura sal ne Filistien Goɓ faɗa. Elkanan we Jair ma Betlehem i Goliat Gatiyo pǝ wulli, kǝ̃r zǝǝ ah tǝgbana kpuu kaŋ mbǝro.
20 Ruura sal yaŋ Gat kpǝ. Dǝɓ ki no gŋ a pǝwahe, a ne tǝwee jol yea yea ne ma ɓal daŋ, tai daŋ joŋ jemma gwa tǝ nai. Ako laŋ dǝɓ kǝsyil Refaimien yo. 21 Ne cok mo tǝǝ za Israel, Yunatan we Syimma naa pah David i ko pǝ wulli.
22 Za matǝ nai mai ara ye morsǝ̃ǝ Refaimien ra ma yaŋ Gat. David ne zan ah ikra ra pǝ wulli.
© Bible Moundang © Alliance Biblique du Tchad, 1996.
